Turkiya Prezidenti Rajab Toyyib Erdo‘g‘an Anqara Livan xavfsizligini ta’minlashga qaratilgan diplomatik sa’y-harakatlarini davom ettirishini hamda mamlakatda tinchlik va barqarorlikni mustahkamlash uchun barcha imkoniyatlarini safarbar etishini bildirdi.
Mazkur bayonotlar juma kuni Istanbulda Prezident Erdo‘g‘an va Livan Bosh vaziri Navvof Salam o‘rtasida bo‘lib o‘tgan uchrashuvda yangradi. Tomonlar uchrashuv davomida mintaqadagi voqealarni, shuningdek, ikki davlat o‘rtasidagi hamkorlik istiqbollarini muhokama qildi.
Prezident Erdo‘g‘an Turkiya qardosh Livan bilan munosabatlarga alohida ahamiyat qaratishini, shu doirada diplomatik aloqalarni yanada faollashtirish foydali bo‘lishini ta’kidladi.
Shuningdek, u Turkiya Livan xavfsizligini ta’minlashga qaratilgan diplomatik tashabbuslarini davom ettirayotganini, mamlakatda ishonch, tinchlik va barqarorlikni qaror toptirish uchun, jumladan, insonparvarlik yordamlari orqali ham qo‘llab-quvvatlashni davom ettirishini qayd etdi.
Erdo‘g‘an Livan va Suriya o‘rtasida yaxshi qo‘shnichilik munosabatlarining rivojlanishi butun mintaqa manfaatlariga xizmat qilishini bildirib, Turkiya bilan Livan o‘rtasidagi ikki tomonlama aloqalarni yanada rivojlantirish uchun ham barcha sa’y-harakatlarni amalga oshirishini ta’kidladi.
