Turkiya Prezidenti Rajab Toyyib Erdo‘g‘an Anqarada bo‘lib o‘tgan NATO Davlat va hukumat rahbarlarining 36-sammiti doirasida Albaniya Bosh vaziri Edi Rama bilan uchrashdi.
Turkiya Aloqa boshqarmasining "NSosyal" ijtimoiy tarmog‘idagi xabariga ko‘ra, payshanba kuni Prezidentlik majmuasida bo‘lib o‘tgan muzokaralarda ikki davlat o‘rtasidagi ikki tomonlama munosabatlar, shuningdek, mintaqaviy va global masalalar muhokama qilindi.
Erdo‘g‘an Turkiya Albaniya bilan aloqalarni yanada rivojlantirishdan manfaatdor ekanligini, xususan, mudofaa sanoati sohasidagi hamkorlikni chuqurlashtirish niyatida ekanligini ta’kidladi. Shuningdek, u Anqarada o‘tgan NATO sammiti ittifoqdoshlar birdamligining kuchini yaqqol namoyish etganini qayd etdi.
Aloqa boshqarmasi xabariga ko‘ra, Prezident Erdo‘g‘an Bosh vazir Ramani joriy yilning noyabr oyida Turkiyaning O‘rta Yer dengizi sohilidagi Antaliya shahrida bo‘lib o‘tadigan COP31 Liderlar sammitiga taklif qildi.
Uchrashuvda Turkiya tashqi ishlar vaziri Hakan Fidan, milliy mudofaa vaziri Yashar Guler, AK partiya raisi o‘rinbosari va matbuot kotibi O‘mer Chelik, Milliy razvedka tashkiloti (MIT) direktori Ibrohim Kalin, Aloqa boshqarmasi rahbari Burhanettin Duran hamda Prezidentning tashqi siyosat va xavfsizlik bo‘yicha bosh maslahatchisi Akif Chagatay Kilich ham ishtirok etdilar.
Qayd etish joizki, Anqaradagi ushbu tadbir Turkiya mezbonlik qilgan ikkinchi NATO sammiti hisoblanadi. Birinchisi 2004-yilda Istanbulda o‘tkazilgan edi.
Yig‘ilish, shuningdek, Turkiya va ittifoqdosh mamlakatlar o‘rtasida siyosiy, xavfsizlik hamda iqtisodiy hamkorlik bo‘yicha ikki tomonlama muzokaralar o‘tkazish uchun muhim platforma vazifasini bajardi.
