Argentina hukumati juma kuni Buenos-Ayres "Malvin orollari" deb ataydigan va Buyuk Britaniya boshqaruvida bo‘lgan Falkland orollarida ruxsatsiz uglevodorod (neft va gaz) qidiruvi hamda qazib olish ishlarini olib borishda ayblangan 45 nafar shaxs va kompaniyaga nisbatan sanksiya choralarini qo‘llashni boshladi.
Prezident Xavyer Miley (Javier Milei) ma’muriyatining ma’lum qilishicha, ushbu huquqiy choralar nafaqat bevosita neft qazib oluvchi kompaniyalarga, balki "ularning aksiyadorlari hamda bu amaliyotlarni osonlashtirish uchun logistika va xizmat ko‘rsatayotgan korxonalar"ga ham qaratilgan. Hukumat bayonotida Argentinaning suverenitetini buzish orqali daromad topishga urinayotganlar "Argentina davlati qonunlarining butun keskinligiga duch kelishi" ta’kidlangan.
Rasmiy Buenos-Ayres Falkland, Janubiy Georgiya va Janubiy Sendvich orollari hamda ularga tutash dengiz hududlari ustidan o‘z da’vosini yana bir bor e’lon qildi. Hukumat ushbu hududlar tarixan va qonuniy ravishda Argentinaga tegishli ekani hamda bu borada "hech qanday shubha yo‘qligini" qayd etgan.
Prezident Miley bundan avvalroq Falkland yaqinidagi eng yirik dengiz uglevodorod loyihasi — "Sea Lion" (Dengiz sheri) Argentinaga jiddiy iqtisodiy va siyosiy tahdid solayotganidan ogohlantirgan edi. Ushbu loyiha Britaniyaning Rockhopper Exploration va Isroilning Navitas Petroleum kompaniyalari tomonidan boshqarilmoqda. Miley agar zudlik bilan chora ko‘rilmasa, xorijiy tuzilmalar "mamlakatning dengiz osti neft zaxiralarini o‘zlashtirib olishi" va ularning hududdagi "noqonuniy hukmronligi" yanada chuqurlashishini ta’kidlagan.
Falkland mojarosi va tomonlar pozitsiyasi
London rasmiy Buenos-Ayresning sanksiyalarini "ichki siyosiy maqsadlarga qaratilgan chora" deb baholadi va uni rad etdi. Britaniya tomoni orollar daxlsizligi hamda ularni himoya qilish majburiyatiga sodiqligini yana bir bor eslatib o‘tdi. O‘z navbatida, Navitas Petroleum va uning hamkorlari Buyuk Britaniya litsenziyasi ostida burg‘ulash ishlarini reja bo‘yicha davom ettirishlarini ma’lum qildi.
Janubiy Atlantikada joylashgan ushbu hudud bo‘yicha ko‘p yillik suverenitet nizosi dengizdagi loyihalar faol burg‘ulash bosqichiga o‘tishi bilan qaytadan alovlandi.
Falkland orollari Janubiy Atlantika okeanida, Argentina qirg‘oqlaridan taxminan 300 mil (483 kilometr) sharqda joylashgan bo‘lib, aholisi kam sonli bo‘lgan Buyuk Britaniyaning dengiz orti hududi hisoblanadi.
Argentina orollar ustidan suverenitet huquqini o‘z vaqtida Ispaniya imperiyasidan meros qilib olganini va Buyuk Britaniya 1833-yildan buyon bu yerlarni "noqonuniy ravishda egallab kelayotganini" da’vo qiladi. Shu sababli Buenos-Ayres orollarni rasman "Islas Malvinas" (Malvin orollari) deb ataydi va mahalliy aholining o‘z taqdirini o‘zi belgilash huquqini mojaroda hal qiluvchi omil o‘laroq tan olmaydi.
