Falastin hududlarini egallab olgan isroilliklar ishg‘ol ostidagi G‘arbiy Sohilning Nablus shahriga qarashli Bizarya hududida tong oldidan bir jome’ masjidini yoqishga urindi va hududdagi devorlarga irqchilik mazmunidagi yozuvlarni qoldirdi.

Mahalliy manbalarga ko‘ra Falastin hududlarini egallab olgan isroilliklar Bizarya hududidagi Nuriddin Zangi jome’ masjidining eshiklarini sindira olmagach, jome’ masjid yonidagi falastinliklarga tegishli uyning bir xonasiga o‘t qo‘ygan.

Hujum oqibatida xonaning derazasi yonib ketgan va binoning tashqi qismiga ziyon yetgan.

Isroillik hujumchilar voqea joyidan ketishidan oldin devorlarga ivrit tilida «Siz ogohlantirildingiz; yo ko‘ching, yo tartibsizlik» mazmunidagi yozuvlarni yozib, falastinliklarni majburan o‘z uylarini tark etishga ishora qilgan irqchilik mazmunidagi so‘zlarni qoldirgan.

Falastin Vaqflar vazirligidan qoralash

Falastin Vaqflar va din ishlari vazirligi ibodat joylarining nishonga olinishi “xalqaro huquq va qonunlar bilan himoyalangan muqaddas maskanlarga tajovuz qilish” ekanini ta’kidlab, hujumni qoraladi.

Vazirlik xalqaro tashkilotlar va inson huquqlari tashkilotlarini ibodat joylarini himoya qilish hamda Falastin hududlariga uyushtirilayotgan takroriy hujumlarni to‘xtatish uchun mas’uliyatni o‘z zimmasiga olishga chaqirdi.

So‘nggi vaqtlarda G‘arbiy Sohilning turli hududlarida Isroilning davom etayotgan bosqinlari va harbiy hujumlari bilan bir vaqtda, radikal yahudiylarning falastinliklar, ularning mol - mulki va tirikchilik manbalariga qarshi hujumlari ham ko‘paymoqda.

Falastinliklarga qarshi hujumlarning oldini olmayotgan Isroil armiyasi Falastin hududlarini egallab olgan isroilliklarga hamrohlik qilish va bu hujumlarga sharoit yaratishda ayblanmoqda.

Isroil 2023 - yilning oktabr oyida G‘azoda boshlagan va genotsid sifatida baholanayotgan hujumlardan beri G‘arbiy Sohilda Isroil armiyasi hamda radikal yahudiylarning hujumlari bir vaqtning o‘zida kuchayib bormoqda.