Isroil qo'shini, Livan janubida bir harbiyning Iso haykalini parchalayotganini ko'rsatuvchi tasvir haqiqiy ekanini tasdiqladi. Ushbu bayonot, Deyr Siryon qishlog'ida bir harbiyning Iso Masih haykalining boshini maxsus asbob bilan maydalayotgani aks etgan videoga nisbatan keng ko'lamli noroziliklardan so'ng berildi. Isroil qo'shini voqea Livan janubida xizmat qilayotgan harbiy tomonidan amalga oshirilganini aniqladi.
Mazkur hurmatsizlik, Isroil qo'shini "diniy binolar yoki ramzlar kabi fuqarolik infratuzilmasiga zarar yetkazish niyatimiz yo'q" deb takrorlab kelayotganiga qaramay yuz berdi. Qo'shin ushbu holat Shimoliy qo'mondonlik tomonidan surishtirilayotganini da'vo qilmoqda, biroq harbiyning shaxsi yoki unga intizomiy jazo qo'llanishi haqida hech qanday ma'lumot bermadi.
AQSHlik siyosatchilar va jurnalistlar Isroil harbiylarining harakatini keskin tanqid qildi
AQSHning sobiq kongress a'zosi Marjori Teylor Grin xabarga keskin munosabat bildirib, AQSHdan milliardlab dollar soliq mablag'lari va qurol-yarog' olayotgan "eng yaqin ittifoqchi"ni tanqid qildi. AQSH OAVlaridagi taniqli shaxslardan biri Rayan Grim: "Isroil harbiylari urush jinoyatlari va madaniy vayronagarchiliklari tasvirlarini ikki yarim yildan beri tinimsiz e'lon qilib kelishmoqda", dedi. Taniqli sharhlovchi va sobiq kongress a'zosi Matt Geyts Isroilning bu harakatini "dahshatli" deb atadi.
Livan matbuoti ushbu hududdagi Ayn Ebel qishlog'ida yana bir xristian maskani zarar ko'rganini xabar qildi. Ma'lumotlarga ko'ra, Isroil hujumlari Sur mintaqasidagi Shamaa qishlog'i bilan birga Livan janubidagi ko'plab diniy maskanlarni nishonga olgan.
Quddusdagi Muqaddas Qabr cherkovida diniy marosimlar o'tkazilishiga to'sqinlik qilindi
O'tgan haftalarda ham Isroil politsiyasi, katoliklar uchun muqaddas hisoblangan haftalik tadbirlarning ochilishini anglatuvchi Palma yakshanbasi marosimini boshqarish uchun Quddusdagi Muqaddas Qabr cherkoviga kirmoqchi bo'lgan Lotin patriarxi kardinal Pyerbattista Pitsaballaning yo'lini to'sgan edi.
Quddus Lotin patriarxati e'lon qilgan bildirishnomada aytilishicha, kardinal Pyerbattista Pitsaballa va cherkovning rasmiy homiysi hamda Muqaddas Yerlar vakili ruhoniy Franchesko Ielponing marosimni o'tkazish uchun cherkovga kirishlari taqiqlangan va ular ortga qaytishga majbur qilingan. Patriarxat o'z bayonotida: "Yuz yillardan beri birinchi marta cherkov yetakchilarining Muqaddas Qabr cherkovida Palma yakshanbasi marosimini o'tkazishlariga to'sqinlik qilindi", deb ta'kidladi.
