Fransiyada yakshanba kechasidan dushanba tongigacha so‘nggi yetti yildagi eng issiq tun qayd etildi. BFMTV telekanalining xabar berishicha, bu 2019-yil iyul oyidagi issiq to‘lqinidan keyingi eng yuqori ko‘rsatkich bo‘lib, mamlakat bo‘ylab o‘rtacha harorat 21.4°C atrofida bo‘ldi.
Parijda "Meteo-France" milliy ob-havo xizmati tungi minimal haroratni 24.2°C deb qayd etdi va bu deyarli 10 yillik rekordning yangilanishiga olib keldi. Kelgusi kechalarda ham harorat odatdagidan yuqori bo‘lishi, ayrim hududlarda 23°C dan 26°C gacha yetishi kutilmoqda.
Issiq to‘lqin butun mamlakatni qamrab olgani sababli xavf darajasi oshirildi: "Meteo-France" ma’lumotiga ko‘ra, 49 ta departament qizil, 40 tasi esa to‘q sariq ogohlantirish zonasiga kiritildi. Prognozlarga ko‘ra, kunduzi harorat 40°C gacha ko‘tarilishi mumkin.
Ekstremal issiqlik kundalik hayotga ham jiddiy ta’sir ko‘rsatmoqda. Milliy ta’lim vaziri Eduar Jeffrayning ma’lum qilishicha, issiq sababli dushanba kuni 845 ta maktab yopildi, 1 800 ta maktab esa ish vaqti rejimini o‘zgartirishga majbur bo‘ldi.
Shu bilan birga, noxush hodisalar ham kuzatilmoqda. Fuqarolik xavfsizligi milliy vakili Jerom Bulanjening "ICI Paris" kanaliga bergan intervyusida ta’kidlashicha, shanba kunidan buyon 13 kishi cho‘kib vafot etgan. Bulanje aholini issiqdan saqlanish va suyuqlik ichish bilan birga, cho‘milishda faqat nazorat ostidagi xavfsiz hududlardan foydalanishga chaqirdi.
