Kanye West Istanbulda rekord oʻrnatdi: 118 ming tomoshabin va unutilmas shou
Dunyoga mashhur rep yulduzi, hozirda Ye nomi bilan tanilgan Kanye West 30-may kuni Istanbuldagi Otaturk olimpiya stadionida rekord darajadagi konsert dasturini taqdim etdi. Sahnada turib ushbu tadbirni "barcha davrlarning eng yirik stadion konserti" deb atagan ijrochi qariyb 118 000 nafar tomoshabinni bir joyga jamlay oldi.
Ikki soat davom etgan ushbu shou Ye uchun Turkiyadagi ilk chiqish, shuningdek, 2014-yildan beri Yevropa hududidagi birinchi yirik konserti boʻldi. Aslida 75 000 kishiga moʻljallangan stadion konsert boshlanishidan bir necha soat oldin liq toʻldi. Pirotexnika effekti, lazer shoulari va porlab turgan ulkan globus shaklidagi sahna fonida stadionda tomoshabinlarning ulkan dengizi hosil boʻldi. Tadbir YouTube orqali jonli efirga uzatilib, uning xalqaro auditoriyasini yanada kengaytirdi.
Konsert sababli shaharga xalqaro muxlislar oqimi yopirildi: minglab odamlar Buyuk Britaniya, Germaniya, Fransiya, Niderlandiya, Italiya, Rossiya, Polsha va Qozogʻistondan tashrif buyurishdi. Gʻarbdagi bir qator davlatlarda Westning avvalgi mojarolari sababli unga boykot va taqiqlar eʼlon qilinganiga qaramay, koʻplab muxlislar Istanbulga kelishni afzal koʻrishdi. Tashkilotchilarning baholashicha, mehmonxona, transport, ovqatlanish va mahalliy xarajatlarni hisobga olganda, ushbu tadbirning shahar iqtisodiyotiga keltirgan foydasi 50–100 million dollarni tashkil etdi. Bu raqamlar hozircha rasmiy hisob-kitob boʻlmasa-da, konsert arafasida Istanbul koʻchalarida xorijiy sayyohlar koʻpligi yaqqol sezilib turdi.
Sahnada West hayqirayotgan olomonga yuzlanib: “Biz rekordni yangiladik! 118 000 odam — bu barcha davrlarning eng yirik stadion konserti”, — deya bevosita xitob qildi. Ushbu koʻrsatkich mazkur shouni chiptali stadion konsertlari tarixidagi eng koʻp tomoshabin toʻplagan tadbirga aylantiradi va AQShdagi soʻnggi rekordlarni ham ortda qoldiradi.
Ijtimoiy tarmoqlar ham bayramona kayfiyatga burkandi. Ulkan olomonning “Can't Tell Me Nothing” kabi xit qoʻshiqlarni joʻr boʻlib kuylayotgani tasvirlangan videolar qisqa fursatda virusli (ommabop) boʻlib ketdi. Nigeriyalik-amerikalik qoʻshiqchi Rotimi ham 70 000 dan ziyod tomoshabin qarshisida chiqish qilganini va “tarixiy voqeaning bir boʻlagiga” aylanganini aytib, oʻz hayajonini yashirmadi. Muxlislar va mashhur blogerlar buni Westning katta sahnaga qaytishi va uning global miqyosdagi taʼsir kuchi hali ham yuqoriligidan dalolat ekanini taʼkidlashmoqda. Shuningdek, stadionni yoritgan yuz minglab telefon chiroqlari va olomonning “Stronger” kabi klassik taronalarni kuylayotgani aks etgan kadrlar tarmoqlarda eng koʻp ulashilgan postlar qatoridan joy oldi.
Koʻngilochar va fan-sahifalar ushbu tadbirni Yevropa tarixidagi eng yirik rep konsertlaridan biri deb atashmoqda. 48 yoshli rep ijrochisi navbatdagi chiqishlarini 6 va 8-iyun kunlari Niderlandiyada oʻtkazishi rejalashtirilgan.
Eslatib oʻtamiz, Kanye West soʻnggi paytlarda global miqyosdagi keskin eʼtirozlarga duch kelayotgan edi. Xususan, u natsizmni targʻib qiluvchi sifatida koʻrilgan “Heil Hitler” nomli qoʻshigʻi sababli qattiq tanqid qilingan. Joriy yilning aprel oyida Buyuk Britaniya uning mamlakatga kirishini jamoat manfaatlariga toʻgʻri kelmaydi deb topib, rad etgan edi, natijada uning Londondagi "Wireless" festivalidagi chiqishi bekor boʻlgandi. Oʻsha oyda Marseldagi konserti ham Fransiya hukumatining qarshiligi sabab kechiktirilgan, Polshadagi konserti esa butunlay bekor qilingan edi.
