Pokiston Eron va AQSh o‘rtasidagi vositachilik sa’y-harakatlarini faollashtirmoqda.
Rasmiy bayonotga ko‘ra, Pokiston Bosh vaziri o‘rinbosari va Tashqi ishlar vaziri Ishoq Dar eronlik hamkasbi Abbos Arakchi bilan telefon orqali muloqot qildi. Mazkur muloqot Islomobodning Vashington va Tehron o‘rtasidagi to‘g‘ridan-to‘g‘ri muzokaralarni tiklash hamda Yaqin Sharqdagi mojaroga diplomatik yechim topishga qaratilgan izchil sa’y-harakatlarining bir qismidir.
Pokiston Tashqi ishlar vazirligi dushanba kuni e’lon qilgan bayonotda qayd etilishicha, muloqot chog‘ida mintaqaviy vaziyat va Pokistonning barqarorlikni ta’minlash yo‘lidagi diplomatik tashabbuslari muhokama qilingan. Abbos Arakchi Pokistonning vositachilikdagi "konstruktiv" roli va "samimiy" harakatlarini yuqori baholadi. O‘z navbatida, Ishoq Dar muammolarni tinch yo‘l bilan hal qilishda muloqot va diplomatiya yagona samarali yo‘l ekanligini ta’kidladi.
Ushbu aloqa Eron TIV Tehronning urushni to‘xtatish bo‘yicha yangilangan 14 banddan iborat taklifiga AQSh tomonidan berilgan javobni ko‘rib chiqayotganini ma’lum qilganidan bir necha soat o‘tib amalga oshirildi.
Eron tomonining ta’kidlashicha, yadroviy dastur masalasi so‘nggi taklifga kiritilmagan. Tehron ushbu murakkab masalani tomonlar o‘rtasida doimiy ravishda o‘t ochishni to‘xtatish kelishuviga erishilgandan so‘ng, muzokaralarning ikkinchi bosqichida muhokama qilishni taklif etmoqda.
Vositachilik jarayonidan xabardor Pokistonlik manbalarning «Anadolu» agentligiga ma’lum qilishicha, AQSh Islomobod orqali yo‘llagan javobida yadroviy dastur bo‘yicha kelishuvni doimiy o‘t ochishni to‘xtatish sharti bilan birgalikda ko‘rib chiqishni talab qilgan. Eronning yangilangan taklifida esa vaqtinchalik sulhni urushning butunlay yakunlanishi darajasiga ko‘tarish, biroq yadroviy masalani keyingi bosqichga qoldirish ko‘zda tutilgan.
Eslatib o‘tamiz, Pokiston joriy yilning 11–12-aprel kunlari Vashington va Tehron o‘rtasidagi muzokaralarning birinchi raundiga mezbonlik qilgan edi. Uchrashuvlar 8-aprel kuni Pokiston vositachiligida imzolangan va keyinchalik AQSh Prezidenti Donald Tramp tomonidan uzaytirilgan ikki haftalik o‘t ochishni to‘xtatish kelishuvidan so‘ng bo‘lib o‘tdi.
