Turkiya Tashqi ishlar vaziri Hakan Fidan Vena shahrida nutq so‘zladi

Turkiya Tashqi ishlar vaziri Hakan Fidan Vena shahrida Xalqaro demokratlar ittifoqi (UID) tomonidan tashkil etilgan “Global noaniqliklar davrida Turkiyaning tashqi siyosati” mavzusidagi tadbirda ishtirok etdi.

Vazir o o‘z nutqida Turkiya joylashgan murakkab geografiyada ishonchli makon, barqarorlik oroli va yuksalib borayotgan yulduz ekanini ta’kidlab, mintaqada tinchlik hamda taraqqiyot tarafdori ekanini urg‘uladi.

G‘azo inqirozi va diplomatik bosim

Isroilning G‘azoga uyushtirgan hujumlaridan keyingi jarayonga to‘xtalar ekan, Fidan Turkiya turli davlatlar bilan hamkorlikda tashkil etilgan guruhlar orqali genotsidni to‘xtatish uchun faol diplomatik bosim o‘tkazayotganini bildirdi. Uning qayd etishicha, Isroil hali ham o‘z agressiv maqsadlaridan voz kechmagan, shu bois xalqaro hamjamiyat tomonidan bosimni davom ettirish hayotiy zaruriyatdir.

Ikki tomonlama standartlarga tanqid

Vazir ayrim davlatlarning Rossiya–Ukraina urushi yoki G‘azodagi vaziyatga nisbatan turlicha yondashayotganiga e’tibor qaratdi:

• Izchillik prinsipi: “Bizning asosiy xususiyatimiz — yuritayotgan siyosatimizdagi izchillikdir. Bir hududda qaysi prinsipga tayansak, boshqa joyda ham aynan o‘sha tamoyil asosida yondashamiz”, — dedi Fidan.

• Insoniy yondashuv: G‘azodagi genotsidni ham, Holokostni ham birdek qoralagan vazir, birini tanqid qilib, ikkinchisiga ko‘z yumish siyosiy axloqsizlik ekanini ta’kidladi. Global inqirozlar davrida Turkiyaning prinsiplarga asoslangan, insoniy va fazilatli pozitsiyasi xalqaro tizim uchun o‘ta muhim ekanini qayd etdi.

Mintaqaviy mas’uliyat va "Hegemon" kuchlar

Hakan Fidan mintaqaning uzoq yillar davomida ichki urushlar, terrorizm va bosqinlardan aziyat chekkanini eslatib o‘tdi. U ayrim kuchlarning tashqi “hegemon” davlatlardan najot kutishini tanqid qilib, bunday kuchlar o‘zidan keyin faqat katta muammolarni qoldirib ketishini aytdi.

Vazir mintaqa xalqlarining o‘z taqdiriga o‘zi egalik qilmasligini “baxtsizlik” deb atadi va barcha mintaqaviy muammolarni begona aralashuvlarsiz, o‘zaro muloqot hamda mintaqaviy mas’uliyat doirasida hal qilish lozimligini ta’kidladi.