Gretsiya sudi G‘arbiy Frakiyadagi turk ozchiligi vakillaridan bo‘lgan to‘rt kishini Iskechedagi Chinor masjidida o‘tkazilgan norozilik namoyishi bilan bog‘liq voqealar yuzasidan aybdor deb topdi va ularning har birini 17 oylik qamoq jazosiga hukm qildi. Biroq mazkur jazolar keyinchalik kechiktirilib, jarimaga almashtirildi.
Mahkama qarori diniy yetakchilik bo‘yicha bahslarni yana kuchaytirdi
Iskeche sudi ayblanuvchilar Husayin Baltaji, O’zan Ahmeto‘g‘lu, Bahri Belcho’ va Murat Köseni voqeaga aloqador ikki alohida jinoyat bo‘yicha aybdor deb topdi.
Ish G‘arbiy Frakiyadagi Chinor masjidida davlat tomonidan tayinlangan diniy rahbarlarning mavjudligi sabab yuzaga kelgan keskinlik bilan bog‘liq voqealarga taalluqli.
2024-yil 11-oktabr kuni Iskeche madrasasining ochilish marosimidan so‘ng davlat tomonidan tayinlangan muftiylar juma namozini boshqarish uchun masjidga kirishga uringan, biroq mahalliy jamoa a’zolarining noroziligi tufayli ichkariga kira olmagan.
Yevropa G‘arbiy Frakiya Turk Federatsiyasi hukmni qoralab, qarorni demokratik tamoyillarga zid deb baholadi va hukm qilingan shaxslarni qo‘llab-quvvatlashini ma’lum qildi.
Federatsiya mazkur ish G‘arbiy Frakiyada muftiylarni tayinlash va turk ozchiligining diniy erkinliklari bo‘yicha uzoq yillardan beri davom etayotgan nizolar bilan chambarchas bog‘liq ekanini bildirdi.
Shuningdek, federatsiya Gretsiyaning muftiylarni davlat tomonidan tayinlash amaliyotini tanqid qilib, ozchilik jamoasiga o‘z diniy rahbarlarini erkin saylash huquqi berilishi kerakligini ta’kidladi.
Bayonotga ko‘ra, ayblanuvchilar turk ozchiligi tomonidan saylangan muftiyni qo‘llab-quvvatlagan va davlat tomonidan tayinlangan muftiylarga qarshi chiqqan. Federatsiya sud qarori G‘arbiy Frakiya turk ozchiligining diniy muxtoriyatini zaiflashtirayotganini ilgari surdi.
Taxminan 14 soat davom etgan sud majlisi davomida ko‘plab G‘arbiy Frakiya turklari ayblanuvchilarni qo‘llab-quvvatlash maqsadida Iskeche adliya binosi oldida to‘plandi.
Gretsiyada G‘arbiy Frakiya turk ozchiligiga xizmat ko‘rsatuvchi muftiylar va vaqf boshqaruvlari davlat tomonidan tayinlanadi. Biroq ozchilik jamoasi uzoq yillardan buyon o‘z diniy rahbarlarini saylash huquqini talab qilib kelmoqda.
