Angliya va Fransiya, Hurmuz bo'g'ozini qayta ochish uchun muvofiqlashtirilgan strategiya ishlab chiqish maqsadida 30 dan ortiq davlatning harbiy rejalashtiruvchilarini bir joyga to'pladi. Chorshanba kuni boshlangan ikki kunlik konferensiya London shimolidagi Nortvudda joylashgan Angliyaning Doimiy Qo'shma Shtab-kvartirasida bo'lib o'tmoqda.
Muzokaralar, so'nggi diplomatik kelishuvlarni barqaror sulh sharoitida qo'llash mumkin bo'lgan aniq harbiy rejaga aylantirishni ko'zlamoqda. Harbiy rejalashtiruvchilar harbiy imkoniyatlar, qo'mondonlik va nazorat hamda kuchlarni mintaqaga qanday joylashtirish masalalariga diqqat qaratdilar.
Prezident Tramp Pokistonning iltimosiga ko'ra Eron bilan sulh muddatini uzaytirdi
AQSH va Isroil 28-fevralda qo'shma hujumlar boshlaganidan so'ng, Eron 2-mart kuni neft va gaz eksporti uchun muhim bo'lgan bo'g'ozda harakatlanish cheklovlarini e'lon qilgan edi. Pokiston 8-aprelda vositachilik qilgan 14 kunlik sulhdan keyin, 11-12-aprel kunlari AQSH va Eron o'rtasidagi uchrashuvlarga mezbonlik qildi. Mazkur sulh muddatining Vashington vaqti bilan chorshanba oqshomida yakunlanishi kutilayotgan edi.
Biroq AQSH Prezidenti Donald Tramp seshanba kuni Pokiston rasmiylarining talabiga binoan, Tehronga yaxlit taklif tayyorlashi uchun vaqt berish maqsadida Eron bilan sulh muddatini uzaytirishini bildirdi. Yangi muzokaralar bosqichi uchun tayyorgarliklar davom etmoqda, ammo yuk tashish yo'lining qayta ochilishi borasidagi noaniqlik hali ham saqlanib qolmoqda.
