Isroil ommaviy axborot vositalarining xabar berishicha, ayrim isroillik xavfsizlik rasmiylari Bosh vazir Binyamin Netanyahu va mudofaa vaziri Israel Katsning Turkiyaga qarshi keskin siyosiy bayonotlari keraksiz taranglikni keltirib chiqarishi mumkinligidan ogohlantirdi.
Isroilning 12-kanali juma kuni bu ogohlantirish 27-oktabrga belgilangan Knesset saylovlari arafasida Netanyahu hukumati Anqaraga qarshi bayonotlarini kuchaytirayotgan bir vaqtda yangraganini ma’lum qildi.
Telekanalga ko‘ra, ayrim xavfsizlik rasmiylari Turkiya bilan kelishmovchilikni kengroq ochiq qarama-qarshilikka aylantirmaslik tarafdori.
Netanyahu va uning Likud partiyasi Turkiya hamda Prezident Rajab Toyyib Erdo‘g‘anni saylovoldi bayonotlari va tashviqotlarida tobora ko‘proq tilga olmoqda.
12-kanalning xabar berishicha, Isroil armiyasi seshanba kuni erta tongda Turkiya chegarasidan qariyb 70 kilometr uzoqlikda joylashgan Suriyaning shimoli-g‘arbidagi Abu Zuhur harbiy aviabazasiga hujum uyushtirilishini talab qilgan.
Telekanal ma’lumotlariga ko‘ra, ayrim xavfsizlik rasmiylari vaziyatning Anqara bilan to‘g‘ridan-to‘g‘ri to‘qnashuvga aylanib ketishiga yo‘l qo‘ymaslik maqsadida hujum haqida jamoatchilik oldida va rasmiy bayonotlarda ortiqcha gapirilmasligini istagan.
Xabarda, shuningdek, rasmiylar hujumdan so‘ng Netanyahu va Kats bergan keskin bayonotlarni ham ma’qullamagani qayd etildi.
Ayni paytda, juma kuni e’lon qilingan qo‘shma bayonotda Turkiya, Jazoir, Indoneziya, Iordaniya, Livan, Malayziya, Mavritaniya, Pokiston, Falastin, Qatar, Saudiya Arabistoni va Somali tashqi ishlar vazirlari Isroil hujumlari Suriyaning “suvereniteti, hududiy yaxlitligi hamda siyosiy birligini ochiqdan-ochiq buzish” ekanini ta’kidladi.
Shuningdek, juma kuni Turkiya G‘azoga yo‘l olgan Global Sumud flotiliyasi faollariga Isroil tomonidan uyushtirilgan hujum bo‘yicha davom etayotgan sud jarayoni doirasida Netanyahu va boshqa ayblanuvchilarga nisbatan Interpol orqali qizil byulleten chiqarishni so‘raganini ma’lum qildi.
Turkiyaning NSosyal ijtimoiy tarmog‘ida e’lon qilingan bayonotda adliya vaziri Akin Gurlek genotsid, insoniyatga qarshi jinoyatlar va qiynoq kabi ayblovlarni o‘z ichiga olgan ish bo‘yicha Netanyahu va Afek Moskovitch ham kiradigan 35 nafar ayblanuvchiga nisbatan Istanbulning 11-og‘ir jinoyatlar bo‘yicha sudida sud jarayoni davom etayotganini bildirdi.
