Tojikiston Prezidenti Imomali Rahmon Shanxay Hamkorlik Tashkiloti (ShHT) doirasida xavfsizlik, savdo, iqtisodiyot, energetika va transport sohalaridagi hamkorlikni yanada kuchaytirish zarurligini ta’kidladi.
Imomali Rahmon Qirg‘iziston poytaxti Bishkek shahrida bo‘lib o‘tgan ShHT Davlat rahbarlari kengashi yig‘ilishidagi nutqida tashkilotning asoschi davlatlaridan biri bo‘lgan Tojikiston ShHTning shakllanishi va xalqaro nufuzini mustahkamlashga katta hissa qo‘shganini bildirdi.
Global geosiyosiy keskinliklar, mintaqaviy mojarolar, terrorizm va ekstremizm tahdidi kuchayib borayotganiga e’tibor qaratgan Rahmon xavfsizlik sohasidagi hamkorlikni mustahkamlash zarurligini ta’kidladi. U ShHTning Giyohvandlikka qarshi kurash markazi hamda Xavfsizlik tahdidlari va xatarlariga qarshi kurashish universal markazi faoliyatini imkon qadar tezroq boshlashi muhimligini qayd etdi.
Rahmon mintaqaviy va xalqaro muammolar, ayniqsa Yaqin Sharq va Eron atrofidagi mojarolar siyosiy va diplomatik yo‘llar orqali hal qilinishi kerakligini qayd etdi. Tojikiston tinchlik va barqarorlikni mustahkamlashga qaratilgan tashabbuslarni qo‘llab - quvvatlashda davom etishini bildirdi.
Savdo va iqtisodiy hamkorlikka chaqiriq
Savdo va iqtisodiy hamkorlik ShHTning ustuvor yo‘nalishlaridan biri ekanini ta’kidlagan Imomali Rahmon sanoat, energetika, transport, tranzit va qishloq xo‘jaligi sohalaridagi hamkorlikka yangi sur’at berish zarurligini qayd etdi.
Rahmon energetika bozorlaridagi noaniqliklarga e’tibor qaratib, an’anaviy energetika sohasidagi hamkorlikni kuchaytirish va yashil transformatsiya loyihalarini qo‘llab - quvvatlash kerakligini ta’kidladi.
Atrof - muhit masalasi barqaror rivojlanish uchun strategik ahamiyatga ega ekanini bildirgan Rahmon muzliklarni himoya qilish, suv resurslaridan samarali foydalanish, yerlarning degradatsiyasining oldini olish va ekologik xavfsizlikni ta’minlash zarurligini aytdi.
Imomali Rahmon nutqi yakunida Pokistonni ShHTga raislikni qabul qilgani bilan tabrikladi. Shuningdek, Lahor shahrini 2026 – 2027 - yillar davomida ShHTning Turizm va madaniyat poytaxti deb e’lon qilish tashabbusini qo‘llab - quvvatlashlarini bildirdi.
