Pentagon rahbari Pit Hegset (Pete Hegseth) mojaroni yakunlash bo‘yicha sa’y-harakatlar sekinlashayotgan bir pallada, Eron bilan yuzaga kelgan urush borasida Kongressda ilk bor ko‘rsatma beradi. Ma’lumotlarga ko‘ra, Qo‘shma Shtatlar Tehronning Hormuz bo‘g‘ozini qayta ochishga qaratilgan so‘nggi taklifiga shubha bilan qaramoqda.
Hegset chorshanba kuni qonunchilarning savollariga javob beradi. Bu Tramp ma’muriyati Eronga qarshi harbiy harakatlarni boshlaganidan beri ilk rasmiy hisobot bo‘ladi. Demokratlar ushbu mojaroni Kongress roziligisiz boshlangan, ixtiyoriy va o‘ta qimmatga tushgan urush sifatida keskin tanqid qilib kelmoqda. Vakillar palatasidagi demokratlar shu oy boshida Hegsetga nisbatan oltita impichment moddasini ilgari surib, uni "og‘ir jinoyatlar va xizmat vazifasini suiste’mol qilish"da ayblashdi.
Vakillar palatasining Qurolli kuchlar qo‘mitasidagi eshituvlar ma’muriyatning 2027-yilgi harbiy byudjet loyihasini muhokama qilishga qaratilgan. Loyihada mudofaa xarajatlarini tarixiy darajaga — 1,5 trillion dollarga yetkazish ko‘zda tutilgan. Hegset va Bosh shtab boshlig‘i Den Keyn (Dan Caine) ko‘proq dronlar, raketa hujumidan mudofaa tizimlari va harbiy kemalarga ehtiyoj borligini asoslab berishlari kutilmoqda.
Demokratlar asosiy e’tiborni Eron urushining o‘sib borayotgan xarajatlari, AQSh o‘q-dori zaxiralarining kamayib ketishi va maktablar bombardimon qilinishi natijasida tinch aholi, xususan, bolalar halok bo‘lganiga qaratishadi. Ayrim qonunchilar Eronning dronlar galasiga (to‘dalariga) qarshi AQSh armiyasining tayyorgarligi darajasini ham so‘roq ostiga olishi mumkin; ushbu dronlar Amerika havo mudofaasini yorib o‘tib, bir necha askarning o‘limi va jarohatlanishiga sabab bo‘lgan edi.
Hozirda o‘t ochishni to‘xtatish tartibi amalda bo‘lsa-da, AQSh va Isroil 28-fevral kuni Kongress nazoratisiz harbiy amaliyotlarni boshlagan edi. Demokratlar Prezident Donald Trampdan Kongress roziligisiz har qanday keyingi harbiy harakatlarni to‘xtatishni talab qiluvchi rezolyutsiyalarni qabul qilishga urindi, biroq hozircha bunga muvaffaq bo‘lmadi.
Respublikachilar Trampning urush davridagi rahbarligini qo‘llab-quvvatlashda davom etmoqda. Bunga sabab sifatida Eron yadro dasturi xavfi, muzokaralar tiklanish ehtimoli va mintaqadan chiqib ketishning oqibatlari ko‘rsatilmoqda. Shunga qaramay, ko‘plab respublikachilar ham urushning tezroq yakunlanishini xohlaydi.
Seshanba kuni Oq uydagi qabulda Tramp Buyuk Britaniya qiroli Karl III va boshqa mehmonlarga Eron "harbiy jihatdan mag‘lub etilganini" ta’kidladi. "Karl bu masalada mendan ham qat’iyroq fikrda; biz raqibning yadroviy qurolga ega bo‘lishiga hech qachon yo‘l qo‘ymaymiz," — dedi Tramp. Biroq Eron armiyasi vakili davlat televideniyesiga bergan intervyusida: "Biz urush tugadi deb hisoblamaymiz," — deya ta’kidlab, Tehronning Vashingtonga nisbatan ishonchi yo‘qligini bildirdi.
