Qatar Amiri va Donald Tramp Yaqin Sharqdagi vaziyat hamda AQSH-Eron muzokaralarini muhokama qildi

Qatar Amiri Tamim bin Hamad Al Soniy va AQSH Prezidenti Donald Tramp oʻrtasida telefon muloqoti boʻlib oʻtdi. Muloqot davomida mintaqadagi keskinlikni pasaytirishga qaratilgan diplomatik saʼy-harakatlar hamda Qatar hamkorligida AQSH va Eron oʻrtasidagi muzokaralar jarayoni atroflicha muhokama qilindi.

Qatar Amiri devoni bergan yozma bayonotga koʻra, tomonlar ikkila mamlakat oʻrtasidagi strategik munosabatlar va hamkorlikni rivojlantirish istiqbollari bilan birga mintaqaviy oʻzgarishlarni baholagan.

AQSH va Eron oʻrtasidagi vositachilik saʼy-harakatlari

Muzokaralar davomida mintaqadagi keskinlikni pasaytirishga qaratilgan diplomatik tashabbuslar, xususan, Qatar vositachiligida AQSH va Eron oʻrtasidagi qarashlarni yaqinlashtirish hamda muloqot jarayonini qoʻllab-quvvatlash borasida olib borilayotgan ishlar diqqat markazida boʻldi.

Shuningdek, muloqotda mavjud inqirozni bartaraf etish, Yaqin Sharqda xavfsizlik va barqarorlikni taʼminlaydigan keng koʻlamli kelishuvga erishishga qaratilgan xalqaro saʼy-harakatlar ham koʻrib chiqildi.

Mintaqaviy xavfsizlik va energetika barqarorligi

Qatar Amiri Tamim bin Hamad Al Soniy kelishmovchiliklarni hal etishda muloqot va diplomatik usullarni davom ettirish muhimligini taʼkidlab, mintaqani yangi keskinliklardan xoli tutish zarurligini bildirdi. U, shuningdek, dengiz yoʻllarida erkin qatnov va energiya taʼminoti xavfsizligini taʼminlash masalalariga alohida eʼtibor qaratdi.

Hozirda Qatar AQSH va Eron oʻrtasidagi keskinlikni yumshatish, harbiy harakatlar qayta boshlanishining oldini olish hamda Hormuz boʻgʻozida kemalar qatnovini qayta yoʻlga qoʻyish maqsadida tomonlar bilan faol muzokaralarni davom ettirmoqda.