The Athletic nashrining xabar berishicha, AQShning Missuri shtati, Kanzas-Siti (Kansas City) shahrida Angliya terma jamoasining Jahon chempionatiga tayyorgarlik ko‘rish uchun tanlagan mehmonxonasi va mashg‘ulot bazasi yaqinida otishma yuz bergan. Hodisada kamida to‘qqiz kishi hayot uchun xavf solmaydigan darajada jarohatlandi.

The New York Times gazetasining sport bo‘limi ma’lumotlariga ko‘ra, politsiya shanba kuni mahalliy vaqt bilan taxminan soat 04:00 da (GMT 09:00) voqea joyiga yetib kelgan va u yerda katta odamlar guruhi tarqalayotganiga guvoh bo‘lgan.

Tartibot posbonlari dastlab hududdagi uch nafar jarohatlangan ayolga birinchi tibbiy yordamni ko‘rsatishgan. Keyinchalik yana olti nafar fuqaro mustaqil ravishda shifoxonaga murojaat qilgan va shu tariqa jarohatlanganlar soni to‘qqiz nafarga yetgan.

Ushbu hodisa Angliya terma jamoasi turnir davomida foydalanishi ko‘zda tutilgan inshootlardan juda qisqa masofada sodir bo‘lgan. Hozirda jamoa a’zolari Floridada bo‘lgani sababli, otishma paytida voqea joyida bo‘lishmagan.

Xabarlarga ko‘ra, hozircha hech bir gumonlanuvchi hibsga olinmagan, tergov harakatlari davom etmoqda.