AQSH Yaqin Sharqqa “USS Theodore Roosevelt” aviatashuvchi kemasi va yana bir dengiz piyodalari diviziyasini yuborishga qaror qilgani bildirildi.
Isroilda efirga uzatiladigan i24 telekanalining AQSH rasmiysiga tayangan xabarida, AQSH uchinchi aviatashuvchi kemasi va ikkinchi dengiz piyodalari diviziyasini Yaqin Sharqqa yuborishi qayd etildi.
Yedioth Ahronoth gazetasi xabarida, qaror AQSH Prezidenti Donald Trampning noyabrdagi oraliq saylovlardan keyin Eronga yana hujum uyushtirish haqidagi tahdidlaridan so‘ng qabul qilingani da’vo qilindi.
The Hill gazetasi “USS Theodore Roosevelt” mintaqadagi kemalardan birining o‘rnini egallash uchun Yaqin Sharq tomon yo‘lga chiqqanini yozdi.
AQSH Yaqin Sharqqa qariyb 10 ming qo‘shimcha harbiy yubormoqda
AQSHning Wall Street Journal gazetasiga ma’lumot bergan amerikalik rasmiylar ham AQSH Mudofaa vazirligi (Pentagon) Yaqin Sharqqa qo‘shimcha 9 mingdan 10 minggacha harbiy yuborishini bildirdi.
Rasmiylar “USS Theodore Roosevelt” aviatashuvchi kemasi 27-sentabr kuni San-Diyegodagi asosiy portidan jo‘nab ketganini ma’lum qildi. Dengiz piyodalarini tashuvchi uchta amfibiya kemasidan iborat “USS Makin Island” amfibiya shaylik guruhi ham 28-sentabr kuni yo‘lga chiqqani va noyabr oxirigacha mintaqaga yetib borishini qayd etdi.
“USS Theodore Roosevelt” 2023-yil 7-oktabrdan keyin Yaqin Sharqqa yuborilgan va bir muddat o‘tib rotatsiya uchun AQSHga qaytgan edi.
AQSHning hozir Yaqin Sharqda “USS George H.W. Bush” va “USS George Washington” nomli ikkita aviatashuvchi kemasi hamda qariyb 50 ming harbiysi bor.
