Ozarbayjon Tashqi Ishlar vaziri Jayxun Bayramov bir tomonda Rossiya – Ukraina urushi, ikkinchi tomonda esa Eron atrofidagi harbiy taranglik davom etayotgan bir paytda Yevropa bilan Osiyo o'rtasidagi aviatsiya qatnovining yirik qismi Janubiy Kavkaz orqali amalga oshirilishini ta'kidlab, "Bu mintaqada barqarorlik va tinchlik hukmron bo'lishining natijasidir" - dedi.
Bayramov Chirag‘an saroyida Turkiya Tashqi Ishlar vaziri Hakan Fidan va Gruziya Bosh vazir o‘rinbosari - Tashqi Ishlar vaziri Maka Botchorishvili ishtirokida bo‘lib o‘tgan «X Turkiya ‑ Ozarbayjon ‑ Gruziya uch tomonlama tashqi ishlar vazirlari yig‘ilishi»dan so‘ng uyushtirilgan qo‘shma matbuot anjumanida fikr bildirdi.
Bayramov Yaqin Sharq va G‘azo hududida butunlay tinchlik o‘rnatish muhimligini ta'kidlab, Eron atrofida sodir bo'layotgan voqealarning ham uch davlatga ta'sir ko‘rsatayotganiga e’tibor qaratdi.
Bayramov, «Diplomatik va siyosiy yo‘llarga ustunlik berilishi, xalqaro huquq qoidalariga rioya qilinishi lozim. O'q uzishlarning to‘xtatilishi va so'ngra doimiy tinchlik o'rnatilishi butun mintaqa uchun eng muhim masalalardan biridir» - dedi.
Turkiya, Ozarbayjon va Gruziya o‘rtasidagi hamkorlik kun tartibi juda keng ekanligini qayd etgan Bayramov, uch do'st va qo'shni davlat o'rtasida olib borilayotgan loyihalar va faoliyatlar bo'yicha muntazam maslahatlashuvlar muhimligini ta'kidladi.
Global muammolarni umumiy sa’y ‑ harakatlar bilan hal etish mumkinligini ta'kidlagan Bayramov, «Global xususiyatga ega ko‘plab muammolarni hech bir davlat yolg'iz hal qila olmaydi. Shuning uchun muvofiqlashtirilgan holda harakat qilish va umumiy pozitsiyani namoyish etish nihoyatda muhim» - dedi.
Hududiy to'qnashuvlar va global xavfsizlik muammolari oldida Turkiya, Ozarbayjon va Gruziya xalqaro huquqqa asoslangan yondashuvni namoyish etayotganini bildirgan Bayramov, uch davlat xalqaro maydonlarda to‘qnashuvlarni yakunlash uchun harakat qilishini ifoda etdi.
To‘qnashuvlar energiya xavfsizligi, ta’minot zanjirlari va transport yo‘llariga jiddiy ta’sir ko‘rsatishini ta'kidlagan Bayramov, ko‘plab mamlakatlar energiya manbalariga kirishda qiyinchiliklarga duch kelayotganini bildirdi.
Turkiya, Ozarbayjon va Gruziya ishtirokida amalga oshirilayotgan energetika va transport loyihalari uzluksiz davom etayotganini ta'kidlagan Bayramov; bu loyihalar nafaqat uch davlatga, balki keng mintaqadagi ko'plab mamlakatlarning energiya va ta'minot xavfsizligiga hissa qo'shayotganini qayd etdi.
Bayramov Janubiy Gaz yo‘lagi orqali Ozarbayjon gazining 16 davlatga yetkazilayotganini qayd etib, "Bu ushbu davlatlar uchun energiya xavfsizligi deganidir" - dedi.
