Binyamin Netanyaxu yakshanba kuni (10.05.2026) CBS News telekanali orqali efirga uzatilgan intervyuda: «Menimcha, juda ko‘p narsaga erishdik ammo Erondan olib chiqilishi kerak bo‘lgan yadroviy materiallar, boyitilgan uran hali ham mavjudligi sababli bu ish hali tugamadi» - dedi.
Netanyaxu AQSh va Isroilning Eronga qarshi boshlatgan urushdagi maqsadlari qatorida uranni boyitish infratuzilmasini yo‘q qilish hamda Eronning raketa va vakil tarmoqlarini qayta tiklashiga yo‘l qo‘ymaslik borligini ta’kidladi.
Harbiy rejalar haqida gapirishni rad etgan Netanyaxu, biroq kelishuv bo‘lsa, uran zaxirasini nazarda tutgan holda: «U yerga kirib, uni yo‘q qilasiz» - dedi.
Isroil ommaviy axborot vositalari shanba kuni (09.05.2026), AQSh Prezidenti Donald Tramp Netanyaxuga uran zaxiralari masalasida hech qanday yon berish bo‘lmasligiga kafolat berganini xabar qildi.
AQSh yordamini qayta ko‘rib chiqish
Netanyaxu, shuningdek, mamlakatining hozirda yiliga 3,8 milliard dollar miqdoridagi AQSh harbiy yordamiga qaramligini bosqichma - bosqich tugatish istagini bildirdi.
«Endi qolgan harbiy yordamdan o‘zimizni xalos qilish va yordamdan hamkorlikka o‘tish vaqti keldi» - degan Netanyaxu, o‘n yillik o‘tish davrini taklif qildi.
Netanyaxu shuningdek, Xitoy, Eronning raketa ishlab chiqarishiga ma’lum darajada yordam berayotganini iddao qildi va ijtimoiy tarmoqlar ta’siri sababli AQShda Isroilni qo‘llab - quvvatlash kamayib borayotgani haqidagi xavotirlariga e’tibor qaratdi.
Boshqa tomondan, Eron yakshanba kuni (10.05.2026) AQShning so‘nggi tinchlik rejasiga bergan javobida bu mamlakatdan kompensatsiya talab qilib, Ho‘rmuz bo‘g‘ozi ustidagi mustaqilligini ta’kidladi.
Tehron o‘z javobida AQSh rejasini «Eron xalqining asosiy huquqlarini« e’tiborsiz qoldiruvchi «haddan tashqari talablar» sifatida baholadi.
