AQSh prezidenti Donald Trump Amerika televideniye tarmoqlari joriy etgan cheklovga o‘zining “Trump TV” platformasini tashkil etish orqali javob berdi. Uzluksiz efir dushanba kuni kechqurun boshlandi. Oq uy hukumat bayonotlari va avvalgi chiqishlar o‘rin olgan kanal sutkasiga 24 soat efir uzatishini ma’lum qildi.
Oq uy dushanba kuni kechqurun “Trump TV” nomli onlayn telekanalni ishga tushirdi. Kanal “eng sara videolar, muhim bayonotlar va o‘tkazib yubormaslik kerak bo‘lgan lavhalarni tezkor yangilanishlar bilan haftasiga 7 kun, sutkasiga 24 soat” namoyish etishi bildirildi.
Kanal efirni boshlagan paytda Trumpning 3-iyul kuni Rushmore tog‘ida so‘zlagan nutqining arxiv tasvirlari namoyish etilayotgan edi.
AQShning yirik televideniye tarmoqlari — NBC, ABC, CBS va Fox News, shuningdek, CNN, Politico va MS Now prezidentlik brifinglaridan chetlatilganiga norozilik sifatida kecha Oq uydan teleko‘rsatuvlar uzatishni to‘xtatishga qaror qildi.
Chetlatilgan uchta ommaviy axborot vositasi Oq uyga kirish huquqini qayta tiklash maqsadida kecha Vashingtondagi federal apellyatsiya sudiga da’vo arizasi ham kiritdi.
Shanba kuni Oq uy xavfsizlik xizmati AQSh prezidenti Donald Trumpning ko‘rsatmasiga muvofiq, mazkur uchta matbuot tashkiloti jurnalistlarining binoga kirishini taqiqlagan edi.
Qarorini o‘zining shaxsiy platformasida e’lon qilgan AQSh prezidenti Donald Trump bu ommaviy axborot vositalari “muntazam ravishda yolg‘on xabarlar tarqatishi oqibatida” chetlatilganini bildirgan edi.
AQSh prezidenti Donald Trump o‘z xabarida prezident, hukumat va AQSh haqida muntazam ravishda asossiz da’volar hamda yolg‘on ma’lumotlar tarqatilishini qabul qilib bo‘lmasligini ta’kidlagan edi.
