Tayvan Milliy migratsiya idorasi chorshanba kuni Nvidia bosh direktori Jensen Xuang bilan ishqiy munosabatda bo‘lgan davrida Xitoy foydasiga josuslik qilishda ayblanayotgan Elis Xuang Tayvanga Hongkong pasporti bilan kirganini bildirdi. Rasmiylar mazkur holat yuzasidan tergov olib bormoqda.
Jensen Xuang Singapurda joylashgan Megaspeed kompaniyasida rahbar lavozimida ishlagan Elis Xuang bilan ishqiy munosabatda bo‘lganini tan oldi. AQSh rasmiylari ayolni Xitoy razvedkasi uchun ishlagan deb hisoblamoqda. Pekin esa josuslik haqidagi da’volarni rad etdi.
Nvidia direktorlar kengashi yakshanba kuni kompaniya bosh direktori va hammuassislaridan biri Jensen Xuang yuzasidan tekshiruv boshlaganini e’lon qildi. Jensen Xuang bilan Elis Xuang o‘rtasida qarindoshlik aloqasi yo‘q.
Tayvan kirish tartiblarini qayta ko‘rib chiqmoqda
Milliy migratsiya idorasi bosh direktori Lin Xun-en jurnalistlarga Elis Xuang Tayvanga Hongkong pasporti bilan kirganini tasdiqladi.
«Hukumatimizning tegishli idoralari mazkur qaydlar va ma’lumotlardan to‘liq xabardor qilingan. Biz uning barcha kirish-chiqish qaydlaridan xabardor edik», — dedi u.
Hongkong pasporti egalari uchun Tayvanga kirish odatda Xitoyning materik qismi pasporti egalariga qaraganda osonroq. Chunki Xitoy fuqarolari Tayvanga borish uchun qo‘shimcha ravishda maxsus ruxsatnoma olishga ariza berishi kerak.
Bu qo‘shimcha cheklovlar qisman Xitoy va Tayvan o‘rtasidagi murakkab munosabatlar bilan bog‘liq. Tayvanga da’vo qilayotgan Pekin orolni o‘z nazoratiga olishini bildirmoqda.
Tayvan ichki ishlar vaziri Lyu Shi-fan parlamentda deputatlarga Elis Xuang «Tayvanga kirgani, ammo hozir xorijda ekani»ni aytdi.
«Agar uning josus ekanini bilganimizda, albatta, Tayvanga kirishiga ruxsat bermagan bo‘lardik. Tartiblarimizni, ayniqsa, dastlabki tekshiruvlar, tashrif davomida o‘tkaziladigan kutilmagan tekshiruvlar, suhbatlar va tashrifdan keyingi choralarni qayta ko‘rib chiqamiz», — deya qo‘shimcha qildi Lyu.
Vazir Elis Xuangning kirish ruxsatnomasi bekor qilinganini va shu tariqa uning Tayvanga qayta kirishiga yo‘l yopilganini bildirdi.
Lyu seshanba kungi bayonotida Tayvan milliy xavfsizlik idoralari mazkur holatni faol ravishda tekshirayotganini ma’lum qilgan edi.
