Eronlik viloyat rasmiylaridan biri dushanba kuni (bugun) bergan bayonotida AQShning tunda Eronning Keshm oroliga qarshi uyushtirgan hujumlari natijasida turar joylar, savdo hududlari yoki muhim infratuzilmaga ziyon yetmaganini ma’lum qildi.
Yarim rasmiy Fars axborot agentligining xabar berishicha mamlakat janubidagi Ho‘rmozgon viloyati gubernatorining siyosiy, xavfsizlik va ijtimoiy masalalar bo‘yicha o‘rinbosari Ahmad Nafisiy nishonga olingan hududlar turar joylar, savdo obyektlari va kommunal xizmat ko‘rsatish inshootlaridan uzoqda joylashganini bildirdi.
«Zarba berilgan nuqtalar turar joylar, savdo hududlari va kommunal xizmatlar infratuzilmasidan tashqarida edi. Shu sababli orolning muhim infratuzilmasi yoki asosiy xizmat ko‘rsatish tizimlariga hech qanday ziyon yetmadi», - dedi u.
Favqulodda vaziyatlar xizmatlari shay holatda
Nafisiyning ta’kidlashicha Keshm orolidagi vaziyat nazorat ostida. Favqulodda vaziyatlar xizmatlari, kommunal xizmat ko‘rsatish bo‘linmalari va ma’muriy idoralar yuqori shaylik holatida faoliyat yuritmoqda.
Bu bayonotlar yakshanba kuni kechqurun janubdagi Bandar - Abbos port shahri va unga yaqin Keshm orolida portlashlar sodir bo‘lgani haqidagi xabarlardan keyin qayd etildi.
Fars axborot agentligi dastlab mahalliy manbalarga tayanib, portlashlar Ho‘rmuz bo‘g‘ozida harakatlanish qoidalarini buzganlikda gumon qilingan kemalarga qarata ogohlantiruvchi o‘q uzilishi oqibatida yuz bergan bo‘lishi mumkinligini xabar qilgan edi. Eron rasmiylari esa hodisa sabablariga doir izoh bermadi.
Strategik dengiz yo‘li keskinlik markazida
Keshm oroli Bandar - Abbos yaqinida, Ho‘rmuz bo‘g‘ozining kirish qismida joylashgan. Ushbu bo‘g‘oz jahon neft eksportining muhim qismi tashiladigan strategik dengiz yo‘li hisoblanadi.
Mazkur voqealar mojaroni yumshatishga qaratilgan diplomatik sa’y - harakatlarga qaramay Vashington va Tehron o‘rtasida bo‘g‘oz xavfsizligi hamda kemalarning erkin harakatlanishi borasidagi keskinlik davom etayotgan bir paytda yuz berdi.
