Isroil armiyasining G‘azo sektorining janubidagi Xon Yunus shahrida uy-joylarini tark etishga majbur bo‘lgan falastinliklar yashayotgan chodirlarga uyushtirgan hujumida uch kishi, jumladan, bir bola halok bo‘ldi, ko‘plab odamlar yaralandi.
Mahalliy manbalardan olingan ma’lumotga ko‘ra, Isroil armiyasi Xon Yunusning janubida ko‘chirilgan falastinliklar boshpana topgan chodirlarni nishonga oldi.
Hujumda bir bola bilan birga uch kishi hayotdan ko‘z yumdi, ko‘plab odamlar yaralandi.
Isroil armiyasi G‘azo sektorining turli hududlarini ham artilleriyadan o‘qqa tutdi va harbiy texnikalar bilan ilgarilab, hujumlarini davom ettirdi.
G‘azo shahrining sharqida ham ko‘chirilgan falastinliklar yashayotgan chodirlarga Isroil armiyasiga tegishli uchuvchisiz uchish apparatlaridan “yondiruvchi bombalar” tashlandi.
Isroil armiyasi Tuffoh mahallasida esa o‘zi qoldirgan, portlovchi moddalar ortilgan harbiy transport vositasini masofadan boshqariladigan moslama yordamida portlatdi.
Isroil armiyasi G‘azo sektorida 2025-yil 10-oktabrda kuchga kirgan sulhga qaramay, hududda deyarli har kuni hujumlar uyushtirmoqda.
