Moskva Ukrainaning janubi-sharqidagi Dnipro shahri va boshqa hududlarni nishonga olgan hujumida 660 dan ortiq dron va raketa ishlatdi. Ukraina Prezidenti Volodimir Zelenskiy ijtimoiy tarmoqlarda bergan bayonotida "Rossiyaliklar qariyb butun tun Dnipro va boshqa shaharlarimizni bombaladi" dedi va nishonlarning ko‘pinchasi shahar infratuzilmasi ekanini bildirdi.

 Viloyat hokimi Oleksandr Xanja Dniprodagi hujum natijasida vayron bo‘lgan binodan ikki kishining jasadi chiqarilganini, yana besh kishi vayronalar ostida qolgan bo‘lishi mumkinligini aytdi. Xanja shaharda 21 kishi yaralanganini ma’lum qildi. Shimoldagi Chernigov viloyatida esa hokim raketa va dron hujumlarida ikki kishi halok bo‘lgani va yetti kishi yaralanganini bildirdi. Zelenskiy "Shunday har bir hujum hamkorlarimizga vaziyat juda jiddiy ekanini va havo mudofaamizni tezlikda kuchaytirish kerakligini eslatib turishi lozim" dedi. Ukraina havo kuchlari Telegramda bergan bayonotida Rossiya Ukrainaga 619 dron va 47 raketa bilan hujum qilganini, ulardan 580 dron va 30 raketa urib tushirilganini ma’lum qildi. Rossiya Ukrainaga har kuni o‘nlab dronlar bilan kichik hujumlar uyushtirsada, ba’zida yuzlab dron va o‘nlab raketalar ishlatiladigan keng ko‘lamli hujumlarni ham amalga oshirib turadi.