Istanbulda yirik xalqaro islomiy moliya yigʻilishi boshlandi. Unda siyosat ishlab chiquvchilar, investorlar va olimlar ushbu sektorning global miqyosdagi taʼsirini kengaytirish hamda Turkiyaning bu sohadagi rolini yanada rivojlantirish maqsadida toʻplandilar.
3-Jahon islomiy iqtisodiyoti sammiti Turkiya Respublikasi Prezidenti adminstratsiyasi homiyligida hamda "Albaraka Sammit Seriyasi" doirasida Istanbul Moliyaviy Markazida joylashgan "Halkbank" bosh qarorgohida oʻtkazilmoqda.
Sammitning ikkinchi kunida soʻzga chiqqan Turkiya Suveren jamgʻarmasi (Varlık Fonu) bosh direktori Salim Arda Ermut Istanbul uzoq muddatli moliyaviy transformatsiya uchun strategik markaz ekanini alohida taʼkidladi. U hozirda qariyb 20 000 nafar xodim hamda muhim nazorat va tartibga solish (regulyator) organlarini oʻz ichiga qamrab olgan Istanbul Moliyaviy Markazining shiddat bilan rivojlanayotgani haqida gapirdi.
Istanbul Moliyaviy Markazi Tez Sur’atlar Bilan Rivojlanmoqda
Ermut investitsiya jarayonlarini soddalashtirish va xalqaro kapitalni jalb etish uchun maxsus ishlab chiqilgan «Yagona darcha xizmat koʻrsatish ofisi» (Bir martalik xizmat ofisi) kabi yangi tizimlarga eʼtibor qaratdi.
U, shuningdek, islomiy moliya tizimi Turkiyaning uzoq muddatli strategiyasida tobora markaziy ahamiyat kasb etayotganini qayd etdi hamda Suveren jamgʻarma tomonidan amalga oshirilgan soʻnggi yirik bitimlarni institutlar darajasidagi majburiyatlar ortib borayotganining yaqqol belgisi sifatida misol qilib keltirdi.
Sammitda ishtirok etayotgan rasmiy shaxslar islomiy moliya qisqa muddatli spekulyatsiyalar (asossiz oldi-sotdi operatsiyalari) oʻrniga ishlab chiqarishga yoʻnaltirilgan samarali investitsiyalar, tadbirkorlik va ijtimoiy farovonlikka asoslangan muqobil iqtisodiy modelni taklif etishini bildirdilar.
Turkiya Respublikasi Prezidenti huzuridagi Investitsiyalar va moliya idorasi rahbari Ahmet Burak Dagʻlioʻgʻli Turkiya ichki islomiy moliya vositalarini global bozorlar bilan integratsiya qilish maqsadida Fors koʻrfazi mamlakatlari, Buyuk Britaniya, Malayziya va Indoneziya bilan aloqalarni izchil kengaytirganini maʼlum qildi.
U, shuningdek, sukuk (foiz olish yoki foiz toʻlashni taqiqlovchi islomiy qimmatli qogʻoz/sertifikat) chiqarish koʻlamini kengaytirish, islomiy moliyaviy instrumentlardan foydalanish imkoniyatlarini oshirish va Islom hamkorlik tashkiloti (IHT) doirasidagi oʻzaro savdoni maxsus ishchi guruh orqali koʻpaytirish ustida faol ishlar olib borilayotganini qoʻshimcha qildi.
Dagʻlioʻgʻli, shuningdek, rivojlanish banklari va kapital bozorlarini oʻzaro bogʻlaydigan raqamli maʼlumotlar platformasini hamda Turkiyada xususiy fondlarni qoʻllab‑quvvatlaydigan yangi ragʻbatlantirish tizimini joriy etish rejalari haqida atroflicha maʼlumot berdi.
Tashkilotchilarning qayd etishicha, mazkur sammit Turkiyani islomiy moliya innovatsiyalari va investitsiyalar boʻyicha yetakchi global markaz sifatida namoyon etishga doir keng koʻlamli maqsad va intilishlarni oʻzida aks ettiradi.
