Yevropa Parlamenti va Yevropa Ittifoqiga a’zo davlatlar vakillari AQSH bilan savdo kelishuvini tartibga soluvchi qonunchilik bo‘yicha to‘xtamga kelishga yaqinlashmoqda. Bu haqda chorshanba kuni Parlamentning bosh muzokarachisi Bernd Lange ma’lum qildi.

Uch tomonlama (trilog) muzokaralarning ikkinchi raundidan so‘ng Lange o‘z bayonotida muhokamalarda "sezilarli ijobiy siljish" bo‘lganini qayd etdi. Ayniqsa, himoya choralarini qo‘llash va taklif qilingan qoidalarni qayta ko‘rib chiqish mexanizmlari bo‘yicha muhim yutuqlarga erishilgan.

"Biz ikkinchi konstruktiv trilokni yakunladik. Unda himoya mexanizmlari hamda asosiy qoidalarning qayta ko‘rib chiqilishi va baholanishi masalalarida ijobiy natijalarga erishdik. Biroq hali qilinishi kerak bo‘lgan ishlar bor", — dedi u.

Lange, shuningdek, muzokarachilar Yevropa Ittifoqining demokratik tartib-qoidalari va qonunchilik muddatlariga rioya qilgan holda, "Turnberry kelishuvi"ning ham "harfi, ham ruhiga" amal qilinishini ta’minlash uchun "tezkor va mas’uliyat bilan" ishlashda davom etishini qo‘shimcha qildi. Navbatdagi muzokaralar raundi 19-may kuni Strasburgda bo‘lib o‘tishi rejalashtirilgan.

Mazkur qonun loyihasi 2025-yil 27-iyulda Shotlandiyaning Ternberri (Turnberry) shahrida AQSH Prezidenti Donald Tramp va Yevropa Komissiyasi rahbari Ursula fon der Lyayen o‘rtasida imzolangan Yevropa Ittifoqi–AQSH Turnberry savdo kelishuviga asoslanadi.

O‘tgan yilning avgust oyida e’lon qilingan qo‘shma bayonotda batafsil bayon etilgan ushbu kelishuv, boj stavkalarini pasaytirish va AQSH bilan Yevropa Ittifoqi o‘rtasidagi keng qamrovli savdo hamkorligini mustahkamlashni ko‘zda tutadi.

Boj xususidagi bandlarni hayotga tatbiq etish uchun Komissiya 28-avgustda ikkita qonuniy taklif kiritdi. Birinchi taklif ma’lum turdagi AQSH mahsulotlariga Yevropa Ittifoqi bozoriga imtiyozli kirish huquqini berishni, ikkinchisi esa ayrim dengiz mahsulotlari (xususan, homarlar) importiga nol darajali boj rejimini uzaytirishni nazarda tutadi.

Yevropa Parlamenti 23-mart kuni Kengash bilan muzokaralar olib borish uchun o‘z vakolatlarini (mandatini) tasdiqlagan edi.