Falastinning qarshilik harakati – Hamas o‘zining yuqori martabali a’zosi Xalil al-Hayyani 2024-yil oktabr oyida G‘azoda Isroil kuchlari tomonidan o‘ldirilgan Yahyo Sinvar o‘rniga siyosiy byuro raisi etib tayinladi.
Harakat dushanba kuni e’lon qilgan qisqa bayonotida al-Hayya Sinvarning o‘rniga “harakat siyosiy byurosining raisi etib saylangani” ma’lum qilindi.
Al-Hayya Hamasning eng ko‘zga ko‘ringan vakillaridan biri sifatida tanilgan.
Isroil Sinvarni o‘ldirganidan so‘ng, Al-Hayya 2024-yil oktabr oyida G‘azodagi harakat rahbarligini o‘z zimmasiga olgan edi. Bungacha u Sinvarning o‘rinbosari lavozimida faoliyat yuritgan.
Al-Hayya 2021-yilda o‘tkazilgan ichki saylovlardan so‘ng Hamasning Arab va Islom aloqalari boshqarmasiga rahbar etib tayinlangan edi.
1960-yilda tug‘ilgan Al-Hayya 1997-yilda Sudandagi Qur’oni Karim universitetida Payg‘ambar sunnati va hadis ilmlari yo‘nalishi bo‘yicha doktorlik darajasini olgan. U 2006-yilda G‘azo shahri vakili sifatida Falastin Qonunchilik kengashiga saylangan.
2007-yil 20-may kuni Isroil kuchlari G‘azo shahrining sharqida uning oila a’zolari to‘plangan joyni bombardimon qilishi oqibatida Al-Hayyaning sakkiz nafar qarindoshi, jumladan bir necha aka-ukasi va o‘g‘illari halok bo‘lgan. Ushbu hujum Al-Hayyaga qarshi suiqasd urinishi sifatida amalga oshirilgan edi.
2023-yil oktabr oyidan buyon G‘azoda 73 mingdan ortiq kishi halok bo‘ldi, 173 mingdan ziyod kishi esa yaralandi.
