Prezident Rejep Tayyip Erdo‘g‘an Prezidentlik majmuasida Trendyol 2026 CEV Yevropa voleybol chempionatida oltin medalni qo‘lga kiritib, ketma - ket ikkinchi bor Yevropa chempioni bo‘lgan Turkiya milliy ayollar voleybol terma jamoasi hamda O‘rta yer dengizi o‘yinlarida chempion bo‘lgan milliy voleybolchilar bilan uchrashdi.
Prezident Erdo‘g‘an voleybolchilar bilan uchrashuvda shunday dedi: «Sharoit qanday bo‘lishidan qat’i nazar hech qachon taslim bo‘lmaydigan milliy xarakterga ega ekanimizni kubokni ikkinchi bor qo‘lga kiritib, yana bir bor namoyon etdingiz. Tribunalarni jo‘shqinlik bilan to‘ldirgan muxlislarimiz bilan ajoyib muhit yaratib, sizlarni juda kuchli qo‘llab - quvvatladik. Televizor qarshisida sizlarni kuzatgan millionlab fuqarolarimiz ‘To‘r malikalar’i uchun bir yurak bo‘ldi. Sizlar bilan birga jamoaning jihozlar bo‘yicha xodimlaridan tibbiy guruhigacha, murabbiylar shtabidan rahbariyatigacha ushbu g‘alabaga hissa qo‘shgan barchaga o‘z minnatdorligim va tabriklarimni bildiraman».
«Sportchilarimizni qo‘llab - quvvatladik».
Hukumat sifatida ish boshlagan ilk kundan boshlab sportning barcha yo‘nalishlarini kuchli qo‘llab - quvvatlab kelayotganlarini ifoda etgan Erdo‘g‘an: «Stadionlardan tortib homiylargacha, ularga zarur bo‘lgan barcha sohalarda moddiy, ma’naviy va har tomonlama sportchilarimiz hamda klublarimiz yonida bo‘ldik. Bir paytlar cheklangan imkoniyatlar va oddiy sport zallarida mashg‘ulot o‘tkazishga majbur bo‘lgan jamoalarimiz endilikda dunyoda havas qilsa arziydigan zamonaviy inshootlarda musobaqalarga tayyorgarlik ko‘rib, o‘zlarini rivojlantirmoqda. Voleybol, xususan, sportga kiritgan ulkan investitsiyalarimizning samarasini ko‘rishdan juda mamnunmiz. Ishonamanki, kelgusida bundan ham yuqori natijalarga erishamiz» - dedi.
«Oldimizda 2028 - yilgi Los - Anjeles yozgi Olimpiya o‘yinlari turibdi»
2026 - yil Turkiya ham terma jamoalar, ham klublar darajasida voleybolda muvaffaqiyatdan muvaffaqiyatga erishgan yil bo‘lganini ta’kidlagan Erdo‘g‘an: «Endi oldimizda, ishtirok etishimiz kafolatlangan 2028 - yilgi Los - Anjeles yozgi Olimpiya o‘yinlari turibdi. U yerda ham chempionlikni qo‘lga kiritishimizga hech qanday shubham yo‘q. Ishonamiz, o‘zimizga ishonamiz va Allohning izni bilan bunga erishamiz. Parvardigor yo‘limizni va baxtimizni ochiq qilsin, oyoqlaringizga tosh tegmasin» - deya ta’kidladi.
