AQSh Prezidenti Donald Trump lavozimidan ketishidan oldin “Kuba masalasini hal qilishni” istayotganini aytib, Karib dengizidagi ushbu orol mamlakatiga qarshi harbiy kuch ishlatish imkoniyatini “albatta ko‘rib chiqishini” bildirdi.
Payshanba kuni Salem News Channel telekanaliga bergan intervyusida prezidentlik muddati tugashidan oldin harbiy aralashuvga rozilik berish-bermasligi so‘ralganida, Trump: “Lavozimimdan ketishimdan oldin Kuba masalasini hal qilmoqchiman”, dedi.
Jurnalistlarga bayonot bergan Trump: “Vaziyatni juda diqqat bilan kuzatyapmiz. U yerda ishlar juda yomon ketyapti. Mamlakat amalda inqirozga yuz tutgan davlatga aylangan”, deya ta’kidladi.
Ota-onasi kubalik bo‘lgan Davlat kotibi Marco Rubioni maqtagan Trump uning ham bu masalani hal qilishni “juda istashini” aytdi.
“Buni xalq uchun, ya’ni bu yerga kelganlarida juda yomon muomalaga uchragan va keyinchalik Amerikadan boshpana topgan kubaliklar uchun amalga oshirishni juda istardim”, dedi u.
“Inqirozga yuz tutgan davlat”
AQSh ma’muriyati Trumpning ikkinchi prezidentlik davrida Kubaga bosimni kuchaytirdi.
Trump avvalroq BMT Bosh Assambleyasida Kubani “inqirozga yuz tutgan davlat” deb atab, “Kubaga ozodlik keladi”, degan edi. Shundan so‘ng Kuba delegatsiyasi zalni tark etgan edi.
AQSh joriy etgan neft blokadasi yoqilg‘i tanqisligi va elektr uzilishlari bilan kurashayotgan mamlakatni og‘ir ahvolga solib qo‘ydi. Eskirgan infratuzilma esa bu muammolarni yanada kuchaytirmoqda.
BMTning inson huquqlari bo‘yicha ekspertlari ushbu neft blokadasini xalqaro huquqning buzilishi deb baholab, uni qoraladi.
