Isroilning G‘azoga qarshi uyushtirgan havo hujumida kamida uch nafar falastinlik halok bo‘ldi. Shu paytda muzokarachilar AQSh vositachiligida erishilgan sulh kelishuvini mustahkamlash maqsadida Hamas yetakchilari bilan uchrashdi.
Tibbiyot xodimlari dushanba kuni hujum Dayr al - Balahdagi maktab tashqarisida turgan bir guruh erkaklarga zarba berganini ma’lum qildi. Isroil armiyasi esa hozircha bu borada izoh bermadi.
Dayr al - Balahdagi al - Aqso shifoxonasida halok bo‘lganlarning jasadlari oq kafanlarga o‘ralgan holda morg tashqarisida yerga qo‘yilgan edi. Ularning yaqinlari va do‘stlari vidolashish uchun kelgan. Ba’zilari qurbonlarning peshonasidan o‘pib, maxsus duolar o‘qidi.
Qurbonlardan birining qarindoshi Umm Hussam Abu al - Rous mavzu haqida shunday dedi: “Bu sulh emas, balki yoshlarimiz uchun tuzoq. Har kuni shahidlar bor, haqiqatan har kuni. Bu yana qancha davom etadi? Uch yoshli bolaning (o‘lik) otasini ko‘rishdan qo‘rqishi adolatdanmi? U ‘Otam do‘kondan menga bir narsa olib kelishga ketgan’ deydi”.
Isroil armiyasi 2025 - yil 10 - oktabrda kuchga kirgan sulhni artilleriya o‘qlari va qurolli hujumlar bilan buzishda davom etib, yangi qurbonlar va jarohatlarga sabab bo‘lmoqda.
G‘azo Sog‘liqni saqlash vazirligi ma’lumotiga ko‘ra sulh kuchga kirganidan buyon kamida 750 kishi halok bo‘lgan, 2 090 kishi jarohatlangan va 760 ta jasad topilgan.
Kelishuvning ikkinchi bosqichi
Zo‘ravonliklar Hamas va boshqa falastin guruhlari yetakchilari shanba kunidan beri Qohirada Misr, Turkiya va Qatardan vositachilar bilan G‘azo kelishuvining ikkinchi bosqichini muhokama qilayotgan bir paytda yuz bermoqda.
AQSh Prezidenti Donald Trampning “Tinchlik kengashi” tomonidan ilgari surilgan rejaga ko‘ra AQSh tomonidan qo‘llab - quvvatlanadigan falastinlik texnokratlardan iborat qo‘mita G‘azoni nazoratga olgach, Hamas sakkiz oy ichida bosqichma - bosqich qurolsizlanishi kerak bo‘ladi.
So‘nggi muzokaralarga yaqin ikki rasmiyga ko‘ra Hamas vositachilarga qurolsizlanish bo‘yicha muzokaralar faqatgina Isroil Trampning oktabr oyidagi kelishuvining birinchi bosqichini, ya’ni G‘azoda to‘liq sulhni, kamchiliksiz amalga oshirgandan keyin davom etishi mumkinligini bildirgan.
Isroil 2023 - yil oktabr oyida G‘azoda genotsid boshladi; 72 mingdan ortiq falastinlikni o‘ldirdi, taxminan 172 ming kishini yaraladi va hududning fuqarolik infratuzilmasining qariyb 90 foizini vayron qildi.
