Tashqi ishlar vaziri Hakan Fidan Rossiyaga amalga oshirgan rasmiy tashrifi doirasida Rossiya Prezidenti Vladimir Putin tomonidan qabul qilindi.

Turkiya diplomatik manbalariga ko‘ra, Putin Fidanni Rossiyaning Qozon shahrida qabul qilgan.

Uchrashuvda Rossiya Tashqi ishlar vaziri Sergey Lavrov hamda Prezident maslahatchisi Yuriy Ushakov ham ishtirok etdi.

Kreml uchrashuvning kirish qismi stenogrammasini e’lon qildi. Unda Putin Moskva va Anqara o‘rtasidagi munosabatlar “barqaror ravishda rivojlanib borayotgani”ni qayd etib, bundan mamnun ekanini bildirdi.

Putin ikki mamlakat o‘rtasidagi aloqalar allaqachon oddiy rasmiy munosabatlar doirasidan chiqib, haqiqiy do‘stona tus olganini va kundan-kunga yangi mazmun bilan boyib borayotganini ta’kidladi.

Kreml Erdo‘g‘onning rolini e’tirof etdi

Putin bu jarayon ko‘p jihatdan Turkiya Prezidenti Rajab Toyyib Erdo‘g‘onning tutumi va sa’y-harakatlari tufayli amalga oshganini aytib, Fidandan Erdo‘g‘onga o‘zining eng ezgu tilaklarini yetkazishni hamda uni Rossiyada har doim mamnuniyat bilan kutib olishlarini bildirishni so‘radi.

Vladimir Putin: “Bugungi tadbir doirasida siz bilan uchrashib, mamlakatlarimiz uchun muhim bo‘lgan dolzarb masalalarni muhokama qilish imkoniyatiga ega bo‘lganimdan mamnunman”, dedi.

Tashqi ishlar vaziri Hakan Fidan esa Putinga Prezident Rajab Toyyib Erdo‘g‘onning salomlarini yetkazib, shunday dedi:

“Mintaqamizda va dunyoda juda muhim voqealar yuz bermoqda. Ayrim masalalar bo‘yicha sizning fikrlaringiz muhim ahamiyatga ega. Muhokama qiladigan mavzularimiz ko‘p. Hamkasblarimiz bilan ikki kundan buyon juda sermahsul uchrashuvlar o‘tkazib, ko‘plab masalalar yuzasidan batafsil fikr almashdik.”