ASELSANdan tarixiy qadam: „Po’lat gumbaz“ uchun 2,46 milliard yevrolik ulkan shartnoma imzolandi

Turkiyaning mudofaa sanoati giganti ASELSAN mamlakat xavfsizligini mustahkamlash yo‘lida rekord darajadagi kelshuvga erishdi. Kompaniya gibrid havo mudofaa tizimlarini xarid qilish bo‘yicha Turkiya Mudofaa Sanoati Raisligi (SSB) bilan umumiy qiymati 2,46 milliard yevro (taxminan 2,75 milliard dollar) bo‘lgan shartnomalarni imzolaganini dushanba kuni rasman e’lon qildi.

Ushbu ulkan kelishuv ASELSAN’ning 51 yillik tarixidagi eng yirik bir martalik shartnoma paketi sifatida qayd etildi. Kompaniyaning Kamuyotni Yoritish Platformasiga (KAP) yo‘llagan rasmiy bayonotida qayd etilishicha, mazkur yangi tijoriy munosabatlar 5-oktyabrdan kuchga kiradi va kompaniya daromadlariga sezilarli darajada ijobiy ta’sir ko‘rsatadi.

Shartnomaning moliyaviy va strategik ahamiyati

So‘nggi e’lon qilingan moliyaviy hisobotlarga ko‘ra, Turkiya Mudofaa Sanoati Raisligi (SSB) ASELSAN’ning sof sotuvlarida 30,6 foiz, savdo qarzlarida esa 37,8 foiz ulushga ega eng asosiy hamkor hisoblanadi.

Garchi kompaniya shartnoma qamrab olgan gibrid tizimlarning yetkazib berish grafigi va texnik tafsilotlarini ochiqlamagan bo‘lsa-da, bu kelishuv Turkiyaning ko‘p qatlamli integratsiyalashgan havo mudofaa tarmog‘ini kengaytirishga xizmat qiladi.

„Çelik Kubbe“ (Po‘lat gumbaz) yanada kuchaymoqda

ASELSAN Bosh direktori Ahmet Akyol Turkiyaning o‘ziga xos ijtimoiy tarmoq platformasi hisoblangan „NSosyal“ sahifasida ushbu loyiha haqida to‘xtalib o‘tdi. Uning ta’kidlashicha, davom etayotgan seriyali ishlab chiqarish ishlari Turkiyaning „Çelik Kubbe“ (Po‘lat gumbaz) havo mudofaa tizimini yanada mustahkamlaydi va vatan osmonini himoya qilishni eng yuqori darajaga olib chiqadi.

Ushbu shartnoma ASELSAN’ning oktyabr oyi boshidan buyon imzolagan uchinchi yirik havo mudofaa kelishuvidir. Kompaniya o‘tgan hafta ham 1 milliard yevrodan ortiq ichki va 488,5 million yevrolik xorijiy eksport shartnomalarini imzolagan edi.