Davom etayotgan sulhga qaramay Isroil payshanba kuni G‘azo shimolidagi Bayt Lahiya hududidagi bir uyga qarshi havo hujumi uyushtirdi. Hujum oqibatida bir oilaning to‘rt nafar a’zosi halok bo‘ldi.
Anado‘lu axborot agentligiga (AA) gapirgan tibbiy manba Bayt Lahiya loyihasi hududida Ahmadlar oilasiga tegishli uy nishonga olinishi ortidan to‘rt nafar marhumning jasadi G‘azo shahridagi «Shifo» nomidagi shifoxonaga olib borilganini bildirdi.
Manbaga ko‘ra hujumda boshqa insonlar ham yaralangan, ko‘plab kishilar esa vayronalar ostida qolib, bedarak yo‘qolgan.
Boshqa tomondan, WAFA axborot agentligi xabariga ko‘ra Isroil harbiy mashinalari va insonsiz havo transportlari G‘azo shimolidagi Jabaliya qochqinlar lagerida ko‘chirilgan insonlar yashayotgan boshpana va chodirlarga qarata o‘q uzgan. Hujumdan so‘ng payshanba kuni ertalab bir necha yarador «al - Shifo» nomidagi shifoxonasiga olib borilgan.
Isroil shifoxona hududini nishonga oldi
Isroil harbiy samolyotlari, shuningdek, lagerdagi «Kamol Advan» nomidagi shifoxonasi yaqiniga havo hujumi uyushtirdi.
Bundan tashqari Isroil Harbiy - dengiz kuchlari Xon Yunus sohillari yaqinidagi dengiz hududlari va G‘azo markazining sharqiy qismlarida kuchli o‘q uzdi.
Mazkur hujumlar Isroil yana bir bor 2025 - yilning 10 - oktabrida kuchga kirgan sulhni buzdi degan ma’noni anglatadi.
Isroil armiyasi 2023 - yilning oktabr oyidan beri olib borayotgan genotsid xususiyatidagi urush davomida falastinlik 73 ming nafardan ortiq insonni o‘ldirdi va 174 ming nafardan ortiq insonni yaraladi. Ushbu urush G‘azodagi harbiy bo‘lmagan infratuzilmaning yirik qismini vayron qildi yoki jiddiy ziyon yetkazdi.
