Mintaqada vaziyat keskinlashmoqda. Eron Islomiy Inqilobiy Gvardiyasi mintaqa bo‘ylab AQShga tegishli deb atalgan bazalarga qarshi keng ko‘lamli raketa va dron operatsiyasini boshladi.
Tehron ma’lumotlariga ko‘ra, Iordaniyadagi «Prince Hassan» aviabazasida yonilg‘i tanklari va o‘q-dorilar ombori yondirilgan. Shuningdek, Bahrayndagi «Sheyxl Isa» aviabazasiga berilgan zarbalar natijasida AQSh dronlarini boshqarish markazi va samolyotlar hangari shikastlangani aytilmoqda. Bundan tashqari, Quvaytdagi ikki aviabaza ham nishonga olingani xabar qilinmoqda.
Eron rasmiylari ushbu hujumlarni o‘z hududiga qilingan so‘nggi zarbalarga javobning «birinchi bosqichi» deb atadi. Tehron qo‘shni davlatlarni ham qat’iy ogohlantirdi: agar ularning hududi Eronga qarshi hujumlar uchun foydalanilsa, bu inshootlar ham «qonuniy nishon» deb e’lon qilinadi.
Vaziyatning yana bir tomoni — Hormuz bo‘g‘ozi. Eron inqilobiy gvardiyasi bo‘g‘ozda navigatsiya qoidalarini buzgan va xavfsizlikka tahdid solgan ikki kemani to‘xtatganini bildirdi.
O‘z navbatida, AQSh Markaziy qo‘mondonligi ushbu zarbalar oldidan Hormuz bo‘g‘ozida Tehronning tijorat yuk tashishiga xalaqit berish imkoniyatlarini cheklash uchun o‘z operatsiyasini o‘tkazganini ma’lum qilgandi.
Eron Tashqi ishlar vazirligi AQShning so‘nggi harakatlarini BMT Xartiyasining qo‘pol buzilishi deb atab, Vashingtonni urush jinoyatlari va xalqaro dengiz savdosini izdan chiqarganlikda aybladi. Mintaqada Eron va AQSh o‘rtasidagi qarshi zarbalar tsikli tobora kuchayib bormoqda.
