"Global Sumud" flotiliyasi vakillarining ma’lum qilishicha, "Freedom Flotilla Coalition" tarkibidagi to‘rtta kema o‘tgan shanba kuni Italiyaning Sirakuza portidan yo‘lga chiqib, hozirda G‘azo sektoriga insonparvarlik yordami yetkazish maqsadida Yunoniston (Gretsiya) hududiy suvlarida harakatlanmoqda.

Rasmiy bayonotga ko‘ra, mazkur to‘rtta kema ayni damda Peloponnes yarimoroli va Krit oroli oralig‘ida o‘z yo‘nalishini davom ettirmoqda. Shuningdek, "Global Sumud" flotiliyasiga qarashli yana 32 ta qayiq Krit orolining janubiy sohilida muvofiqlashtirilgan holda kutib turgani va flotning navbatdagi harakat rejasi yaqin soatlarda aniqlanishi ma’lum qilindi.

Shu bilan birga, Turkiyaning Marmaris shahrida flotiliyaga qo‘shilishi kutilayotgan kemada tayyorgarlik ishlari yakuniga yetgan, faollar uchun o‘tkazilayotgan o‘quv mashg‘ulotlari esa davom etmoqda. Kemaning yo‘lga chiqish vaqti hozircha aniq emas.

Vakillarning qayd etishicha, flotiliya birlashib, G‘azo tomon yo‘l olishidan oldin dengizdagi ob-havo sharoiti va xavfsiz navigatsiya strategiyalari atroflicha baholanmoqda. Kemalar joylashuvi va harakatini "Freedom Flotilla Coalition"ning maxsus onlayn platformasi orqali real vaqt rejimida kuzatib borish mumkin.