Ichki ishlar vazirligi bayonotiga ko‘ra, Turkiya Bosh xavfsizlik boshqarmasi Razvedka boshqarmasi muvofiqlashtiruvida Afyo’nkarahisar va Eskishehir viloyat xavfsizlik boshqarmalarining razvedka bo‘linmalari tomonidan qo‘shma operatsiya o‘tkazildi.

Olib borilgan ishlar natijasida 15-iyuldagi davlat to‘ntarishiga urinish vaqtida Prezident Erdo‘g‘onga suiqasd uyushtirishga uringan guruh tarkibida bo‘lgan, Interpolning qizil byulleteni bilan qidiruvda bo‘lgan, harbiy xizmatdan chetlatilgan sobiq kapitan hamda sobiq vertolyot uchuvchisi bo‘lgan terrorchi B.K.ning yashirinib yurgan joyi aniqlandi.

Terrorchi B.K. Afyo’nkarahisar viloyati Xavfsizlik boshqarmasining Terrorizmga qarshi kurash bo‘limi xodimlari tomonidan qo‘lga olindi.

Vazirlik bayonotida FETO’ va uning tuzilmalariga qarshi kurash qat’iyat bilan davom ettirilishi ta’kidlandi.

Yashirin uyda qo‘lga olindi

Shuningdek, tergov harakatlari davom etayotgan B.K. shahar markazidagi İnaz Deprem Evleri hududida joylashgan tashkilotga tegishli yashirin uyga uyushtirilgan operatsiya davomida qo‘lga olingani bildirildi.

Xavfsizlik manbalarining ma’lum qilishicha, suiqasd urinishidan so‘ng qo‘lga tushmaslik uchun doimiy ravishda qiyofasini o‘zgartirib yurgan terrorchi soxta shaxsni tasdiqlovchi hujjatlardan foydalangan. U yuzni aniqlash tizimida qayd etilgach fosh etilgan. Ma’lum muddat kuzatuv ostida bo‘lgan B.K. katta miqdordagi pul bilan chet elga qochishga uringan paytda qo‘lga olingan.