Rossiyaning Ukraina sharqidagi Slovyansk shahriga boshqariladigan bombalar bilan uyushtirgan hujumida besh kishi halok bo‘ldi, kamida 15 kishi yaralandi.
Latviya hujum oqibatida Slovyanskdagi faxriy konsulligi binosi vayron bo‘lgani va ikki xodim yaralanganini ma’lum qildi.
Sumidagi pochta bo‘limiga zarba berildi
Ukraina shimolidagi Sumi shahrida shanba kuni pochta bo‘limiga Rossiya uchuvchisiz uchish apparati bilan uyushtirilgan hujumda ikki kishi halok bo‘ldi.
Sumi harbiy ma’muriyati rahbari Sergiy Krivosheyenko reaktiv dvigatelli uchuvchisiz uchish apparati pochta bo‘limiga zarba berganini bildirdi. Uning aytishicha, halok bo‘lganlardan biri 49 yoshli erkak bo‘lgan, ikkinchi qurbonning shaxsini aniqlash ishlari davom etmoqda.
Ukraina janubidagi Zaporijjyada uyushtirilgan boshqa bir hujumda esa bir kishi yaralandi.
Buchadagi hujum yuzasidan ehtiyotsizlik bo‘yicha tergov boshlandi
Rossiya juma kuni Kiyev viloyatining Bucha tumanida mudofaa sanoati vakillari ishtirokidagi tadbir o‘tkazilayotgan xususiy o‘quv maydoniga ballistik raketa bilan zarba bergan edi.
Hujumda kamida 10 kishi halok bo‘lgan, qariyb 100 kishi yaralangan edi.
Ukrainalik prokurorlar tadbirning urush davom etayotgan bir paytda va aholi yashash hududlariga yaqin joyda o‘tkazilishida ehtiyotsizlikka yo‘l qo‘yilgan yoki qo‘yilmaganini aniqlash maqsadida tergov boshladi.
Moskva esa Rossiya hududiga qarshi hujumlarda foydalanilgani aytilayotgan uchuvchisiz uchish apparatlari namoyish etilgan obyektni nishonga olganini da’vo qildi.
