Filippin va Xitoy tashqi ishlar vazirlari Janubiy Xitoy dengizidagi keskinlik ustidan uchrashdi.

Filippin Tashqi Ishlar vaziri Mariya Tereza Lazaro bilan Xitoy Tashqi Ishlar vaziri Van I Filippin poytaxti Manila shahrida bo‘lib o‘tgan ASEAN Tashqi Ishlar vazirlari kengashining 59 - yig‘ilishi doirasida uchrashdi.

Tomonlarning Filippin "Ayungin", Xitoy esa "Jenay (Ren'ai)" deb ataydigan, Janubiy Xitoy dengizidagi Spratli orollari tarkibiga kiruvchi va Filippin nazoratidagi Ikkinchi Tomas sayozligi (Second Thomas Shoal) atrofida yuzaga kelgan keskinlikdan so‘ng uchrashgani e'tibor o‘ziga jalb etdi.

Lazaro muzokaralar chog‘ida bahsli sayozlikda "filippinlik xodimlarga nisbatan sodir etilgan ammo qabul qilib bo‘lmaydigan harakatlar" sabab Manila Xitoyga keskin norozilik bildirganini ifoda etdi.

Shuningdek, u China Daily gazetasi tomonidan 2016 - yildagi Janubiy Xitoy dengizi arbitraj qarori munosabati bilan filippinliklarni maymun qiyofasida tasvirlagan sun'iy intellekt yordamida yaratilgan videolar va karikaturalarni "qabul qilib bo‘lmaydigan va haqoratli" deb atadi.

Lazaro, shuningdek, Xitoydan bahsli Skarboro sayozligi (Scarborough Shoal) hududida paydo bo‘lgani aytilayotgan "suzuvchi platforma"ni olib tashlash talabini yana bir bor takrorladi.

Uchrashuvda tomonlar aloqa kanallarini ochiq saqlash, keskinlikni nazorat ostida ushlash hamda ikki tomonlama munosabatlarni rivojlantirishning amaliy yo‘llarini muhokama qildi.

Xitoy ham Filippinga norozilik bildirdi

Sinxua agentligi xabariga ko‘ra, Van I uchrashuv davomida Filippinga tegishli qayiqlar Xitoy Sohil qo‘riqlash xizmati kemasiga urilgani hamda xitoylik xodimlarga eshkaklar bilan hujum qilingani yuzasidan Pekin Manila hukumatiga norozilik bildirganini ma'lum qildi.

Van I - ning ta'kidlashicha, ikki davlat o‘rtasidagi munosabatlar "uzluksiz qiyinchiliklarga duch kelmoqda". U mintaqada tinchlik va taraqqiyotni saqlab qolish zarurligini qayd etdi.

Shuningdek, u Filippin "mintaqaviy tinchlik va barqarorlikka putur yetkazuvchi manbaga aylanganini", ikki davlat o‘rtasidagi vaziyatga tashqi kuchlarning aralashuvi esa "Filippinning boshqalar tomonidan boshqarilishiga olib kelishini" ta'kidladi.

Van I Xitoy Filippin uchun xavfsizlik tahdidi emasligini bildirib, vaziyatni ikki tomonlama muloqot orqali hal etishga sodiq ekanini yana bir bor tasdiqladi.

U Filippinni "dengizdagi provokatsion harakatlarni to‘xtatishga" va ikki tomonlama munosabatlarni barqarorlashtirish uchun aniq qadamlar tashlashga chaqirdi.

Bahsli sayozlikdagi keskinlik

Filippin 20 - iyul kuni Janubiy Xitoy dengizidagi bahsli sayozlikda Xitoy Sohil qo‘riqlash xizmati (CCG) xodimi Filippin harbiy - dengiz kuchlari xizmatchisining boshiga tayoq bilan urib, uni yaralagani hamda dengizchining qayig‘iga ziyon yetkazganini ma'lum qilgan edi.

Xitoy esa bahsli sayozlikda Filippinga tegishli qayiqlar CCG kemasiga urilgani va xitoylik xodimlarga eshkaklar bilan hujum qilinganini iddao qilgan edi.