Isroilga kirishi taqiqlangan 11 nafar deputatdan biri bo‘lgan britaniyalik deputat Zarah Sultana bu qarorni «faxr nishoni» deb atadi va «qo‘rqitish orqali sukut saqlashga majbur qilinmasligini» ta’kidladi.
Sultana X platformasi orqali mavzu haqida post qoldirdi va unda: «Isroil hozirgina mamlakatga kirishimni taqiqladi. Genotsid, aparteid va noqonuniy bosqinchilik siyosatini olib borayotgan fashistik hukumat haqida gap ketayotgan bir paytda, men buni faxr nishoni deb bilaman» - dedi.
Sultana, Buyuk Britaniya hukumati seshanba kuni erta tongda bosib olingan G‘arbiy Sohildagi noqonuniy Isroil aholi punktlariga nisbatan savdo taqiqini e’lon qilganidan so‘ng Isroilga kirishi taqiqlangan 11 nafar britaniyalik deputat qatoridan joy oldi.
«Your Party» (Sening partiyang) nomidan Koventri Saut okrugi deputati bo‘lgan Sultana «Isroil genotsidi va Buyuk Britaniyaning unga sherik bo‘lishiga» qarshi e’tiroz bildirishni davom etishini ta’kidladi.
Deputat yangi hukumatni «falastinliklarga qarshi genotsid sodir etayotgan davlatni qurollantirish, u bilan savdo qilish va hamkorlik qilishda» ayblab, so‘zlarini quyidagicha davom etdi: «Aksincha, bu taqiq o‘z ovozimni ko‘tarishda davom etish qat’iyatimni yanada kuchaytiradi. Bir kun kelib Quddusga bosib olingan shahar sifatida emas, balki falastinliklar uzoq vaqt davomida mahrum etilgan erkinlik, qadr - qimmat va tenglikdan bahramand bo‘ladigan, barcha uchun teng huquqlar amal qiladigan yagona davlat tarkibidagi erkin va mustaqil Falastinning bir qismi sifatida tashrif buyurishni intiqlik bilan kutaman».
Sultana bilan bir qatorda Isroilga kirishi taqiqlangan boshqa deputatlar orasida Jeremy Corbyn, Naz Shah, Diane Abbott, John McDonnell, Richard Burgon, Hannah Spencer, Carla Denyer, Sian Berry, Ellie Chowns va Adrian Ramsay ham bor.
