Isroil armiyasi sulh va doiraviy kelishuvga qaramay, Livan janubidagi shaharchalarga havo hujumlarini davom ettirar ekan, bir maktab binosini portlovchi moddalar bilan vayron qildi.
Livanning rasmiy NNA agentligi xabariga ko‘ra, Isroil harbiy samolyotlari Livan janubidagi Hanin va Qantara shaharchalariga havo hujumlari uyushtirdi.
Isroil harbiy samolyotlari, shuningdek, Sharqiy Zavtar va Yuqori Nabatiya shaharchalari o‘rtasidagi Ayn as-Samahiya hududini ham nishonga oldi.
Sur shahriga qarashli Mansuri shaharchasidagi ayrim uylar ham havo hujumlariga uchradi.
Hanin shaharchasiga uyushtirilgan yana bir havo hujumida Birlashgan Millatlar Tashkilotining Livandagi Muvaqqat tinchlikparvar kuchlari — UNIFIL qarorgohi atrofi nishonga olindi.
Bundan tashqari, Isroil armiyasi Kafr Tibnit shaharchasidagi Shahid Mahmud Faqih davlat maktabi binosini portlovchi moddalar bilan vayron qildi.
Isroilning Livandagi hujumlari va sulh jarayoni
Isroil armiyasi 2-mart kuni Livanga keng ko‘lamli havo hujumlarini boshlab, mamlakat janubidagi o‘nlab shaharchalarni ishg‘ol qilgan edi.
Livan hukumati shu davrda mamlakatda o‘z uyini tark etishga majbur bo‘lganlar soni bir milliondan oshganini ma’lum qilgan edi.
Livan va Isroil o‘rtasida 17-aprel kuni kuchga kirgan sulh keyinchalik bir necha bor uzaytirildi.
Livan Sog‘liqni saqlash vazirligi so‘nggi bayonotida, Isroilning 2-martdan buyon mamlakatga uyushtirgan hujumlarida kamida 4 ming 383 kishi hayotdan ko‘z yumganini bildirgan edi.
Vashingtonda Isroil va Livan o‘rtasida o‘tkazilgan to‘g‘ridan-to‘g‘ri muzokaralarning beshinchi bosqichidan so‘ng, 26-iyun kuni Livan va Isroil o‘rtasida doiraviy kelishuv imzolangan edi.
