Tramp xitoylik hamkasbiga: “Xitoyga va qilayotgan ishlaringizga katta hurmat bilan qarayman. Siz ajoyib yetakchisiz. Siz bilan do‘st bo‘lish men uchun sharaf,” dedi.

AQSH Prezidenti Pekindagi Xalq Katta Zalida o‘tkazilgan marosimda Si Szinpin bilan bo‘lgan shaxsiy yaqinligini ham alohida ta’kidladi.

Si Szinpin esa uchrashuv boshida qilgan bayonotida, Prezident Tramp bilan ikki davlat va butun dunyoni qiziqtirayotgan masalalarni muhokama qilishni, shuningdek AQSH-Xitoy munosabatlarini to‘g‘ri yo‘nalishda rivojlantirib, kelajak uchun yangi sahifa ochishni istashlarini bildirdi.

Ikki lider o‘rtasidagi sammit asosan savdo va iqtisodiy hamkorlikni kengaytirish masalalariga qaratildi. Shu bilan birga, mintaqaviy xavfsizlik masalalari ham kun tartibidan joy oldi. Xususan, AQSH va Isroilning 28-fevral kuni Eronga qarshi boshlagan hujumlaridan keyin Yaqin Sharqdagi keskin vaziyat muhokama qilindi.

Amaldagi sulhga qaramay, Xitoy tomonlar o‘rtasida muloqot olib borishga chaqirgan edi. Vashington esa Pekinni Eronning harbiy va iqtisodiy infratuzilmasini qo‘llab-quvvatlashda ayblamoqda.

Trampning Xitoy safari davomida unga AQSH Davlat kotibi Marco Rubio, Mudofaa vaziri Pete Hegseth hamda Tesla, NVIDIA va Apple kabi yirik AQSH kompaniyalari rahbarlari hamrohlik qildi.

Donald Tramp avvalgi prezidentlik davrida ham, 2017-yilda, Xitoyga rasmiy tashrif buyurgan edi.