Turkiya Tashqi Ishlar vaziri Hakan Fidan Yaponiyada faoliyat yurituvchi Nikkei Asia nashriga bergan intervyusida Turkiya - Yaponiya o‘rtasidagi hamkorlik istiqbollari haqida fikr bildirdi.
Hakan Fidan Turkiyaning insonsiz havo transportlari (IHT) ishlab chiqarish sohasida yetakchi davlatlardan biri ekanini ta’kidlab, Anqaraning Tokio bilan mudofaa sanoati yo‘nalishidagi aloqalarni yanada mustahkamlashga tayyorligini ma’lum qildi.
“Turkiya bilan Yaponiya bir - birini to‘ldiruvchi imkoniyat va salohiyatlarga egadir. O‘zaro manfaatli hamkorlikni rivojlantirish uchun mustahkam asos mavjud deb hisoblaymiz”, — dedi u.
Fidanning ta’kidlashicha, Turkiya ishlab chiqqan insonsiz havo transportlari yoki dron texnologiyalari turli operatsion sharoitlarda o‘z samaradorligini isbotlagan. Ayniqsa, qirg‘oq va chegara xavfsizligini ta’minlash sohalarida Yaponiya bilan qo‘shma tadqiqotlar olib borish hamda qo‘shma ishlab chiqarishni yo‘lga qo‘yish uchun muhim imkoniyatlar mavjud. “Aviasiya sohasida, xususan, insonsiz havo tizimlari va dronlarga qarshi kurash texnologiyalari yo‘nalishida Turkiya ilg‘or va amaliyotda sinovdan o‘tgan salohiyatni shakllantirdi. Bu esa ikki mamlakat o‘rtasidagi hamkorlik uchun mustahkam poydevor bo‘lib xizmat qilishi mumkin”, — dedi vazir.
Ulkan hamkorlik imkoniyatlari mavjud
Hakan Fidan ikki mamlakat o‘rtasidagi hamkorlik faqat mudofaa sanoati bilan cheklanib qolmasligini qayd etdi. Uning so‘zlariga ko‘ra energetika, raqamli transformatsiya, aviatsiya va kosmik texnologiyalar, robototexnika hamda barqaror ta’minot zanjirlari kabi yo‘nalishlarda ham hali to‘liq ishga solinmagan katta salohiyat mavjud.
Turkiyaning strategik ahamiyatga ega mineral resurslari haqidagi savolga javob berar ekan, Fidan mamlakatning uzoq muddatli sanoat strategiyasiga to‘xtaldi. “Bizning maqsadimiz faqat xomashyo qazib olish bilan cheklanmaydi. Asosiy vazifa — yuqori qo‘shilgan qiymatga ega yarim tayyor va tayyor mahsulotlar ishlab chiqarishdir. Shu nuqtai nazardan, Yaponiya texnologiyasi va investitsiyalari bilan amalga oshiriladigan hamkorlik har ikki tomon uchun manfaatli sheriklikni yaratishi mumkin. Biz bu yo‘nalishda Yaponiya bilan yaqin hamkorlik qilishga tayyormiz”, — dedi Hakan Fidan.
