Turkiya Vazirlar Mahkamasi ikki haftalik tanaffusdan soʻng, kun tartibidagi oʻta muhim masalalarni muhokama qilish uchun yana yigʻiladi.
Prezident Rajab Toyyib Erdoʻgʻon raisligida oʻtadigan majlisning markaziy mavzusi — Yaqin Sharqdagi inqirozni bartaraf etish va uning oqibatlarini yumshatish choralari boʻladi. Ayni paytda Anqara AQSh va Eron oʻrtasidagi muzokaralar jarayonini diqqat bilan kuzatib bormoqda. Mintaqada yangi xavfsizlik tizimini shakllantirish uchun faol harakat qilayotgan Turkiya rahbariyatining asosiy maqsadi — imkon qadar tezroq barqaror tinchlikka erishishdir.
Shu maqsadda Prezident Erdoʻgʻon soʻnggi bir hafta ichida AQSh Prezidenti Donald Tramp va eronlik hamkasbi Masʼud Pezeshkiyon hamda boshqa xalqaro yetakchilar bilan telefon muloqotlari oʻtkazdi. Vazirlar Mahkamasi yigʻilishida Erdoʻgʻon rahbarligida olib borilayotgan ushbu faol tinchlik diplomatiyasining dastlabki natijalari atroflicha tahlil qilinadi.
Iqtisodiy dastur va bozorlardagi soʻnggi vaziyat
Yaqin Sharqdagi keskinlik, ayniqsa, Ormuz boʻgʻozi atrofidagi noaniqliklar global iqtisodiyot va xalqaro savdoga salbiy taʼsir koʻrsatishda davom etmoqda. Hukumat yigʻilishida ushbu geosiyosiy xavflarning Turkiya iqtisodiyotiga taʼsirini minimal darajaga tushirish hamda mamlakatda dezinflyatsiya (inflyatsiyaning pasayish) jarayonining barqarorligini taʼminlash boʻyicha koʻriladigan choralar muhokama qilinadi.
Shuningdek, Oʻrta muddatli dastur (OMD) va 12-Rivojlanish rejasi doirasida hayotga tatbiq etilayotgan iqtisodiy islohotlar hamda ichki bozordagi joriy holat baholanadi.
Kun tartibida — “Terrorsiz Turkiya” strategiyasi
Vazirlar Mahkamasi yigʻilishida “Terrorsiz Turkiya” konsepsiyasi ham asosiy mavzulardan biri boʻladi. Davlatning tegishli tuzilmalari terrorchi tashkilotlarni butunlay tugatish jarayonini tezlashtirishga qaratilgan turli mexanizmlar ustida ishlashni davom ettirmoqda.
Mazkur tizimli saʼy-harakatlar hamda ushbu jarayon doirasida amalga oshirilishi rejalashtirilayotgan qonunchilikka oid qadamlar hukumat aʼzolari tomonidan koʻrib chiqilishi kutilmoqda.
