Ukraina Tashqi ishlar vazirligi Rossiyaning mamlakatning turli hududlariga uyushtirgan hujumlari oqibatida kamida 6 kishi halok bo‘lgani, 20 kishi yaralanganini bildirdi.
Vazirlikning juma kuni X platformasida bergan bayonotiga ko‘ra, mamlakat janubi-sharqidagi Zaporijjya viloyatida yonilg‘i quyish shoxobchasida yong‘in yuzaga kelgan, infratuzilmaga zarar yetgan va 2 kishi yaralangan.
Xarkiv viloyatida esa havo hujumlari omborxona, turar joylar va transport vositalariga zarba bergan. Ular orasida 4 nafar bola ham bo‘lgan 10 kishi yaralangan, bir kishi halok bo‘lgan.
Bir necha hududda qurbonlar soni ortdi
Mamlakatning markaziy qismidagi Dnipropetrovsk viloyatida hujumlar xususiy uylar, pochta bo‘limi va transport vositalariga zarar yetkazdi.
Vazirlik Pavlograd shahrida 8 yoshli qizaloq halok bo‘lganini, yana bir kishi yaralanganini ma’lum qildi.
Janubdagi Odessa viloyatida Rossiya hujumlari natijasida yoqilg‘i tashuvchi sisternalar hamda gaz tashuvchi tankerda yong‘in yuzaga keldi. Bir kishi halok bo‘ldi, 4 kishi yaralandi.
Takroriy havo hujumi ogohlantirishlari sababli yong‘inni o‘chirish ishlari qiyinlashgani bildirildi.
Donetsk viloyatining sharqidagi Kramatorsk shahrida esa 3 kishi halok bo‘ldi, kamida 6 kishi yaralandi.
Vazirlik: “Rossiyaning to‘xtash niyati yo‘q”, deya bayonot berib, Ukrainaning hamkorlarini Rossiyaga nisbatan yanada og‘ir sanksiyalar qo‘llashga va mamlakat havo mudofaasini kuchaytirishga chaqirdi.
Bayonotda: “Ukrainaning havo hujumlaridan o‘zini himoya qilish salohiyati oshirilishi kerak. Ukraina havo mudofaasining mustahkamlanishi insonlar hayotini saqlab qolish uchun muhim ahamiyatga ega”, deyiladi.
Mazkur da’volar mustaqil manbalar tomonidan tasdiqlanmadi.
Ayni paytda har ikki tomon ham tun davomida dronlar bilan bog‘liq faol harakatlar kuzatilganini ma’lum qildi. Ukraina armiyasi 79 ta Rossiya dronini urib tushirganini bildirgan bo‘lsa, Rossiya Mudofaa vazirligi havo mudofaa tizimlari 133 ta Ukraina dronini yo‘q qilganini da’vo qildi.
