Isroilning G‘azoda qochqinlar yashayotgan chodirlarga qarshi uyushtirgan havo hujumlari oqibatida falastinlik 3 kishi halok bo‘ldi, 25 kishi yaralandi. Tel - Aviv ma'muriyati o‘t ochishni to‘xtatish kelishuvini buzishda davom etmoqda.
Sog‘liqni Saqlash manbalarining Anado‘lu axborot agentligiga ma'lum qilishicha, G‘azoning janubidagi Xon Yunusning g‘arbida joylashgan qochqinlar uchun mo‘ljallangan ikki chodirga qarshi uyushtirilgan hujumda 15 yoshli Islom Abu Shamala ham - da uning 35 yoshli akasi Abdulloh Abu Shamala halok bo‘ldi, yana 6 kishi yaralandi.
Voqea guvohlarining aytishicha, Isroilga tegishli insonsiz havo transporti Xon Yunusning g‘arbidagi al - Mavasi hududida, Roni ko‘chasi kirishiga yaqin joylashgan ar - Rashid ko‘chasidagi yonma - yon turgan ikki chodirni nishonga olgan.
Hujum oqibatida ikki chodir butunlay vayron bo‘ldi, atrofdagi vaqtinchalik boshpanalar ham ziyon ko‘rdi. Hujumda yaralangan 45 yoshli Zohir Abu Salim keyinchalik shifoxonada vafot etdi.
Insonsiz havo transportlari tinch aholini nishonga oldi
G‘azo shahrida Isroilga tegishli insonsiz havo transporti al - Jalaa ko‘chasidagi Dabit chorrahasi yaqinida yo‘ldan o‘tayotgan tinch aholini nishonga olishi oqibatida, aksariyati ayollar va bolalardan iborat falastinlik 18 kishi yaralandi.
Yaradorlardan ikki nafarining ahvoli og‘ir ekani bildirildi.
Ma'lum qilinishicha, hujum qochqinlar yashayotgan yoki jon saqlayotgan chodir yaqinidagi piyodalarga qaratilgan bo‘lib, shu paytda yo‘ldan jamoat transporti vositasi ham o‘tayotgan edi.
G‘azoning shimolidagi Jabaliya hududida esa Isroilga tegishli insonsiz havo transporti lagerning g‘arbidagi al - Faluja mavzesida to‘plangan falastinliklar ustiga bomba tashlashi oqibatida 9 yoshli qizaloq yaralandi.
Isroil zirhli texnikalari o‘t ochishni to‘xtatish chizig‘idan o‘tdi
G‘azoning markaziy qismida Isroilning ikki tanki va bitta harbiy buldozeri kuchli o‘t ochish ostida al - Mag‘ozi qochqinlar lagerining janubi - sharqi ham - da Dayr al - Balahning sharqida taxminan 200 metr g‘arb tomonga ilgariladi.
Harbiy texnikalar Isroilning G‘azoda bosib olgan hududlari chegarasini belgilovchi va "sariq chiziq" deb ataladigan hududdagi beton to‘siqlarni olib tashladi.
Voqea guvohlarining ta'kidlashicha, nishonga olingan hudud o‘t ochishni to‘xtatish kelishuviga ko‘ra Isroil armiyasi nazorat zonasidan tashqarida joylashgan.
G‘azo Sog‘liqni saqlash vazirligi ma'lumotiga ko‘ra Isroilning o‘t ochishni to‘xtatish kelishuvini buzishi oqibatida shanba kuniga qadar 1 ming 38 nafar falastinlik halok bo‘lgan, 3 ming 329 kishi esa yaralangan.
Mahalliy rasmiylar ma'lumotiga ko‘ra 2023 - yilning 8 - oktabridan boshlangan G‘azo urushi davomida 73 ming nafardan ortiq falastinlik halok bo‘lgan, 173 ming nafardan ziyod kishi yaralangan, fuqarolik infratuzilmasining qariyb 90 foizi vayron bo‘lgan.
