Arab koalitsiyasi matbuot kotibi, brigada generali Turki al-Malikiy AQSHning X kompaniyasiga tegishli ijtimoiy tarmoqdagi sahifasida bayonot berdi.
Malikiy husiylarning Saudiya Arabistoni, uning fuqarolari va milliy salohiyatini nishonga olishga urinishlari mas’uliyatsiz hamda dushmanona munosabatni aks ettirishini ta’kidladi.
Uning aytishicha, husiylarning Abha, Xamis Mushayt, Jizon va Najron shaharlaridagi fuqarolik hamda tijorat obyektlariga uyushtirgan so‘nggi hujumlarida 73 kishi yaralangan. Malikiy bu hujumlar Saudiya Arabistoni suverenitetining ochiqdan-ochiq buzilishi va mamlakat xavfsizligiga tahdid ekanini qayd etdi.
Malikiy “terrorchi husiy jangarilar” tomonidan hech qanday asossiz amalga oshirilgan ushbu hujumlar Saudiya Arabistonining iqtisodiy salohiyatiga zarar yetkazishni maqsad qilganini bildirdi.
U Arab koalitsiyasi kuchlari husiylarning hujumlarini bartaraf etish va bunday tajovuzkor munosabatga qat’iy qarshi turish uchun zarur bo‘lgan barcha “operativ” choralarni ko‘rishini ta’kidladi.
Eron tomonidan qo‘llab-quvvatlanadigan husiylar 2014-yil sentabridan buyon poytaxt Sana shahri bilan birga Yamanning ayrim hududlarini nazorat qilib kelmoqda. Saudiya Arabistoni yetakchiligidagi koalitsiya esa 2015-yil martidan buyon Yaman hukumatini qo‘llab-quvvatlamoqda.
