Rossiya Davlat rahbari Vladimir Putin Rossiya va Ukraina o‘zaro kelishuvga erishishi kerakligi va buning uchun imkoniyat borligini ta’kidlab, “Oxir - oqibat, muammo mojaro tomonlari o‘rtasida hal qilinishi kerak”, - dedi.
Vladimir Putin Vladivostok shahrida bo‘lib o‘tayotgan 11 - Sharqiy iqtisodiy forumning yalpi majlisida ishtirok etdi.
Forumda so‘zga chiqqan Putin AQSh Ukraina inqirozi hal etilgach, Rossiya bilan munosabatlarga e’tibor qaratishiga urg‘u berib, quyidagilarni ta’kidladi:
“Rossiya bilan Ukraina o‘zaro kelishuvga erishishi kerak. AQSh va Xitoy kabi boshqa davlatlar esa bu jarayonni qo‘llab - quvvatlashga tayyor. Oxir - oqibat, muammo mojaro tomonlari o‘rtasida hal qilinishi kerak. Bu tomonlar — Rossiya va Ukrainadir. Biz buni to‘g‘ri yondashuv deb hisoblaymiz. Muammoni hal qilishga hissa qo‘shishga harakat qilayotgan barchaga minnatdorchilik bildiramiz. Xo‘sh, muammoni hal qilish imkoniyati bormi? Menimcha, bor”.
Putin Ukraina Prezidenti Vladimir Zelenskiy Rossiya fuqarolik aviatsiyasiga tahdid qilganiga ishora qilib, “Bu davlat terrorizmining ko‘rinishidir. Bu tinchlik muzokaralarini olib borish imkoniyatlarini qiyinlashtiradi. Bunga jim qarab turgan Ukrainaning G‘arbdagi ittifoqchilari xalqaro terrorizmga sherik bo‘lib qolmoqda”, - deya baho berdi.
Vladimir Putin Ukraina tomoni bilan razvedka xizmatlari orqali aloqalar davom etayotganini ham ma’lum qildi.
Rossiya rahbari mamlakatidagi yoqilg‘i muammosi haqida gapirar ekan, “Har qanday vaziyatga tayyor bo‘lishimiz kerak”, - dedi.
Putin Germaniya o‘tgan oy Leypsig - Halle aeroportida portlovchi moddalar yuklangan dron topilgani sababli Rossiyaning Bonndagi Bosh konsulxonasini yopishga qaror qilganini eslatib, shunday dedi:
“Germaniya o‘zining asossiz qo‘rquvlari sababli Rossiya va Germaniya fuqarolarini konsullik hamda madaniy xizmatlardan foydalanish imkoniyatidan mahrum qildi. Berlindagi elchixonamiz viza, pasport va notarial xizmatlar bo‘yicha vazifalarni o‘z zimmasiga oladi”.
