Tusk Germaniya poytaxti Berlinda E5 guruhi (Germaniya, Fransiya, Buyuk Britaniya, Italiya va Polsha) yetakchilari hamda NATO Bosh kotibi Mark Rutte ishtirokidagi uchrashuvdan so‘ng o‘tkazilgan qo‘shma matbuot anjumanida so‘zga chiqdi.

U Yevropa, G‘arb dunyosi va Ukrainaning kelajagi Yevropa hamda transatlantik birdamlikni saqlab qolishga bog‘liq ekanini aytib, Anqaradagi NATO sammiti oldidan bu xabar ochiq va ravshan tarzda yetkazilishi kerakligini bildirdi.

"Yevropadagi birdamlikni saqlashda davom etamiz"

Tusk Rossiya va Ukraina o‘rtasidagi urush davom etayotgan bir paytda Polsha Yevropadagi birdamlikni mustahkamlashda davom etishini ta’kidladi. Ayrim siyosatchilar transatlantik aloqalarning ahamiyatini yetarlicha qadrlamayotganiga qaramay, Polsha bu hamkorlikni himoya qilishda davom etishini qayd etdi.

Shuningdek, u Rossiyaning "tajovuzkor siyosati" tufayli bevosita tahdid ostida bo‘lgan NATOning sharqiy qanoti davlatlari barcha xalqaro formatlarda munosib vakillikka ega bo‘lishi kerakligini aytdi. Tuskning fikricha, Polsha, Skandinaviya mamlakatlari, Boltiqbo‘yi davlatlari va Ruminiyasiz Rossiya bilan kechayotgan "sivilizatsiyalar o‘rtasidagi kurash"da muvaffaqiyatga erishish qiyin.

So‘zining yakunida Tusk mudofaa bo‘yicha majburiyatlarini jiddiy qabul qilayotgan barcha davlatlar Yevropa xavfsizligi va o‘z milliy mudofaa salohiyatini kuchaytirish uchun yanada ko‘proq sa’y-harakat qilishi zarurligini ta’kidladi.