Kanada Jahon chempionatining pley-off bosqichidagi ilk o‘yinida Janubiy Afrikani 1:0 hisobida mag‘lub etib, tarixiy g‘alabani qo‘lga kiritdi. Mezbonlardan biri bo‘lishiga qaramay, guruhda g‘olib chiqa olmagan Kanada terma jamoasi o‘z tarixida ilk bor 1/8 final yo‘llanmasini Stiven Eustakioning o‘yin yakunidagi goli evaziga naqd qildi.
Har ikki jamoa ham yo‘qotish bosqichida ilk bor ishtirok etayotgani sababli o‘yin qo‘shimcha vaqtlarga o‘tadigandek ko‘ringan edi, biroq Eustakio jarima maydonchasi tashqarisidan yo‘llagan aniq zarbasi bilan Janubiy Afrikaning umidlarini chilparchin qildi.
Mezbonlik maqomiga ega bo‘lishiga qaramay, guruh bosqichini yuta olmagani uchun Los-Anjelesda o‘ynagan Kanada endi 4-iyul kuni Xyustonda 1/8 final doirasida Niderlandiya yoki Marokash bilan to‘qnash keladi. Shu tariqa, Janubiy Afrikaning Jahon chempionatidagi ishtiroki yakunlandi.
Kanada uchrashuv boshidan hujumkor o‘yin namoyish etib, Janubiy Afrikaning zich himoyasiga qarshi bir nechta xavfli vaziyat yaratdi. Janubiy Afrika esa asosan qarshi hujumlarga tayanib, vaqti-vaqti bilan xavf solib turdi.
O‘yin yakunidagi burilish
Uchrashuvning 60-daqiqasidan keyin Kanada yana darvoza tomon yaqinlashdi. Zaxiradan maydonga tushgan Niko Sigur Tani Oluwaseyiga aniq pas uzatdi; uning zarbasini darvozabon qaytardi, to‘p Jonatan Devid tomon yo‘nalganida esa himoyachi Mbekezeli Mbokazi birinchi bo‘lib yetib kelib, xavfni bartaraf etdi. 75-daqiqada jamoa yulduzi Alfonso Devis maydonga tushdi va katta shovqin-suron ostida o‘yin dinamikasiga darhol ta’sir o‘tkazdi.
To‘xtash vaqtining ikkinchi daqiqasida Kanada qanotdan hujum tashkil etdi. Jeykob Shaffelburg o‘ng qanot bo‘ylab yugurib, markazga aniq uzatma berdi; himoyachilar to‘pni bosh bilan qaytargach, u Eustakio tomon yo‘naldi. "Portu" yarim himoyachisi to‘pni ko‘kragi bilan nazorat qilib, bir zarbada uni chap pastki burchakka aniq yo‘lladi.
Stadion "portladi"; Kanadaning zaxira o‘rindig‘idagi futbolchilar maydonga yugurib chiqib, tarixiy g‘alabani tantana qilishdi.
