Rossiya Mudofaa vazirligi juma kuni bergan bayonotida, mazkur insonparvarlik almashinuviga Birlashgan Arab Amirliklari vositachilik qilganini ma’lum qildi.
BAA vositachiligida amalga oshirilgan almashinuv
Vazirlikka ko‘ra, ozod etilgan rossiyalik harbiylar hozirda Belarus hududida bo‘lib, ularga psixologik va tibbiy yordam ko‘rsatilmoqda.
Bayonotda, “Ozod etilgan harbiylar ayni paytda Belarusda. Bu yerda ularga zarur psixologik va tibbiy yordam ko‘rsatilmoqda. Keyinchalik davolanish va reabilitatsiya uchun Rossiyaga yuboriladi”, deyiladi.
Shuningdek, Rossiya Inson huquqlari bo‘yicha vakili Yana Lantratova ham harbiylar bilan birga ekani bildirildi.
Almashinuv bo‘yicha tayyorgarlik bir necha hafta oldin boshlangan
Ukrainaning ayrim yuqori martabali rasmiylari almashinuv bo‘yicha tayyorgarlik ishlari so‘nggi haftalarda boshlanganini ma’lum qildi.
Mazkur almashinuv Ukraina Prezidenti Volodimir Zelenskiyning to‘rt yildan beri davom etayotgan urushni tugatish maqsadida Rossiya Prezidenti Vladimir Putinni yuzma-yuz uchrashuvga chaqirganidan bir kun o‘tib amalga oshirildi.
Rossiya Mudofaa vazirligi bayonotida:
“5 iyun kuni Kiyev rejimi nazoratidagi hududlardan 185 nafar rossiyalik harbiy qaytarildi. Buning evaziga 185 nafar ukrainalik harbiy asir topshirildi”, deyiladi.
Zelenskiy: Asirlarni qaytarish ustuvor vazifamiz
Ukraina Prezidenti Volodimir Zelenskiy ozod etilgan ayrim ukrainalik harbiylar 2022 yildan buyon Rossiyada saqlab kelinganini bildirdi.
U ijtimoiy tarmoqdagi sahifasida:
“Vatandoshlarimizni uyga qaytarish Ukraina uchun doimiy ustuvor vazifadir. Har kuni har bir ukrainalik erkak va ayolni asirlikdan ozod qilish uchun ishlayapmiz”, deb yozdi.
Ukraina rasmiylari Ukraina bayroqlariga o‘ralgan, sochlari qirib tashlangan harbiylarning bir-birlarini quchoqlayotgani aks etgan suratlarni ham e’lon qildi.
